Tálibter Aýǵanstandaǵy sot ǵımaratyna shabýyl jasady - 6 adam qaza boldy, 70 adam jaralanǵan
ÁBÝ-DABI. 3 sáýir. QazAqparat - Arab BAQ habarlamalary boıynsha «Talıban» qozǵalysynyń sodyrlary Aýǵanstannyń Farah provıntsııasyndaǵy sot ǵımaratyna basa-kóktep kirip, atys shyǵardy, sonyń saldarynan kem degende alty adam qaza bolyp, 70 adam jaraqat aldy.
Farah provıntsııasy bılik ókilderiniń habarlaýynsha, jergilikti ýaqyt boıynsha tańerteń saǵat segizder shamasynda bes shabýyl jasaýshy eki áskerı mashınamen sot ǵımaratynyń aldyna kelip toqtaǵan. Sonymen birge, avtomobılderdiń biri qaqpanyń janynda birden jarylǵan, onda eki sodyr qaza bolyp, qalǵan úsh qylmysker sot ǵımaratyna kirip, atys shyǵardy.
Jergilikti qaýipsizdik kúshteri eki sodyrdyń kózin joıǵan, tiri qalǵan jalǵyz shabýylshy ǵımaratta qarýly qarsylyqty jalǵastyrýda.
«Olardyń biri áli qarsylasýda, ol qaýipsizdik kúshteriniń bes qyzmetkerin jaralady», - dep jetkizdi Farah polıtsııasynyń basshysy Agha Nýr Kentos.
Jergilikti aýrýhana dárigeri Vakıl Ahmad tańerteńnen beri aýrýhanaǵa 50-den astam adam tústi dep habarlady, olardyń ishinde azamattyq tulǵalar, áskerıler, sondaı-aq eki sýdıa da bar.
Aýǵan úkimetine qarsy kúresip jatqan «Talıban» qozǵalysy dereý qandy shabýylǵa óz qatystylyǵy jóninde habarlady. «Talıban» saıtynda: «Bizdiń jaýyngerlerimiz aldyn ala josparlanǵan tásiline sáıkes, Farah provıntsııasynyń birneshe úkimettik ǵımarattaryna shabýyl jasady. Olar shabýyldy atý qarýyn jáne granata qoldanýmen júrgizdi» degen aqparat ornalastyrylǵan.
Farah provıntsııasy Aýǵanstannyń batysynda Iranmen shekarada ornalasqan, Gerat jáne Gılmend provıntsııalarymen kórshiles tur.
