Talıbandar bılikti alǵanda Aýǵanstannan ushyp shyqqan ushaqtar Ózbekstanda qalatyn boldy
ASTANA. Kazinform – Vashıngton-Tashkent kelisimine sáıkes, «Talıban» Kabýldy basyp alǵan kezde Aýǵanstannan Ózbekstan aýmaǵyna ushyp ótken birqatar áskerı ushaqtar, tikushaqtar jáne basqa da tehnıkalar Ózbekstanda qalatyn boldy. Bul týraly The Khaama Press habarlady.
Aýǵanstandaǵy «Talıbannyń» ýaqytsha úkimetindegi Qorǵanys mınıstrligi AQSh pen Ózbekstan arasyndaǵy bul kelisimdi “qısynsyz” dep atady.
«Talıban» AQSh-pen jasalǵan bul kelisimdi qoldamaıtynyn, Ózbekstannan burynǵy úkimettiń ushaqtaryn Aýǵanstanǵa qaıtarýdy talap etetinin aıtqan. Talıbandar bılikti qolǵa alǵanǵa deıin Aýǵanstanda 164 jaýyngerlik ushaq bolǵan, qazir olardyń sany 81. Óıtkeni Aýǵanstan áýe kúshteriniń ushqyshtary ushaqtar men tikushaqtardyń bir bóligin Ózbekstan men Tájikstanǵa alyp ótip úlgergen. Osy kezde AQSh-tyń Tashkenttegi elshisi Djonatan Henık Aýǵanstannyń burynǵy áskerı ushaqtarynyń taǵdyry týraly Ózbekstanmen kelisimge kelip, olardyń Vashıngtonǵa tıesili ekenin málimdedi. Vashıngton-Tashkent kelisimi boıynsha, burynǵy Aýǵanstan úkimetiniń ushaqtary Ózbekstanda qaldy.
Henık ushaqtardyń eshqashan aýǵandyqtardiki bolmaǵanyn, aýǵandyq áskerılerdiń olardy paıdalanǵanyn, biraq menshik quqyǵy árqashan AQSh-ta qalǵanyn atap ótti.
Buǵan jaýap retinde «Talıban» ýaqytsha úkimetindegi Qorǵanys mınıstrligi bul kelisimdi qabyldamaıtynyn aıtyp, kórshilestik qarym-qatynastyń mańyzdylyǵyna toqtalyp, Ózbekstannan Aýǵanstan Áskerı-áýe kúshteriniń ushaqtaryn Talıban ákimshiligine berýde yntymaqtasýdy surady.
