«Talıban» qozǵalysy soǵystaǵy jeńisine oraı mıtıng ótkizdi

ÓSKEMEN. QazAqparat – Búgin Aýǵanstandaǵy «Talıban» qozǵalysynyń jaqtastary Kabýlda jańa úkimetti qoldaý maqsatynda jappaı mıtıng ótkizdi, dep habarlaıdy QazAqparat tilshisi Geo TV arnasyna silteme jasap.

Mıtıngke aýǵan halqynyń dástúrli kıimin kıgen er adamdar ǵana qatysty. Jalpy jınalǵan jurttyń sany 1500-ge jýyq.

Aýǵanstannyń ýaqytsha úkimeti Din isteri mınıstriniń orynbasary Mýslım Hakkanı óz sózinde «sheteldik áskerdi elden shyǵarǵan ıslamdyq qozǵalystyń tarıhı jeńisin» joǵary baǵalady.

«Bul - biz kútken kún. Óz maqsatymyzǵa jettik. Biraq endi barymyzdy qorǵaýymyz kerek. Elimizdiń bolashaǵy jarqyn», - dedi bosqyndar jónindegi mınıstr Halıl Hakkanı.

Shara barysynda «sheteldiktermen uzaq merzimdi soǵysta qaza tapqan» tálipterge qurmet kórsetildi. H.Hakkanıdiń aıtýynsha, «Talıban» qozǵalysy óz bıligin jeti apta ishinde nyǵaıtyp, halyq qoldaıtyn ákimshilik qurdy».

Buǵan deıin tálipterdiń ýaqytsha úkimetine qarsy narazylyq aktsııalary jıi uıymdastyrylǵan bolatyn. Olardyń kópshiligine áıelder qatysqan. Alaıda ruqsat etilmegen sherýlerge tyıym salynǵannan keıin mıtıng ótkizetinder kúrt tyıyldy.

Aıta keteıik, búgingi tańda eshbir memleket Talıban úkimetin áli moıyndaǵan joq.