«Talıban» qozǵalysy BUU Bas assambleıasynyń otyrystaryna qatysýǵa nıetti
«Talıban» qozǵalysynyń janyndaǵy Aýǵanstannyń turaqty ókili laýazymyna bekitý úshin Katar astanasy Dohadaǵy saıası keńseniń ókili Mohammed Sýhaıl Shahınniń kandıdatýrasy usynyldy.
BUU Bas Hatshysyna jiberilgen «Talıban» qozǵalysynyń ótinishi 9 adamnan, sonyń ishinde AQSh, Reseı jáne Qytaı ókilderinen turatyn uıymnyń akkredıtteý komıtetimen qaralady. Alaıda tálipterdiń ótinishi qaralmaıynsha, Gýlam Isakzaı osy uıymdaǵy Aýǵanstannyń elshisi bolyp qalmaq.
«20 qyrkúıek kúni bas hatshy 21-27 qyrkúıek aralyǵynda ótetin BUU Bas Assambleıasynyń 76-shy sessııasyna qatysýǵa tálipterden ótinish hat aldy. Hattyń taqyryby «Aýǵanstan Islam Ámirligi» dep berilgen, oǵan syrtqy ister mınıstri retinde Ámir Han Mottakı qol qoıǵan. Sonymen qatar hatta Ashraf Ǵanıdiń 15 tamyzdan bastap qyzmetten qýylǵany jáne endi el prezıdenti sanalmaıtyny kórsetilgen», - dep málimdedi BUU bas hatshysynyń ókili Stefan Dıýjarrık.
Odan bólek, Germanııanyń syrtqy ister mınıstri Haıko Maas «Talıban» ókilderiniń BUU Bas Assambleıasynda sóz sóıleýine qarsy shyqty.
«Talıbannyń» BUU-da sóz sóıleýi esh paıda ákelmeıdi dep sanaımyn. Meniń oıymsha, bul suraqta sheshim izdeý maqsatymen BUU Bas Assambleıasyna júginý orynsyz», - dedi nemis saıasatkeri.
Óz kezeginde AQSh Memlekettik departamenti «Talıban» radıkaldy qozǵalysynyń BUU-ǵa ókildik etýi máselesin sheshý biraz ýaqytty talap etedi, osy sessııa barysynda sheshilýi ekitalaı dep sanaıdy.
BUU Bas Assambleıasynyń 76-shy sessııasy 21 qyrkúıek kúni bastalyp, 27 qyrkúıekke deıin sozylmaq.
Otyrystardyń ortaq taqyryby – «Jaqsylyqqa degen senimmen ómirsheńdikti nyǵaıtý – COVID-19-dan keıin qaıta órleý, turaqty qalpyna keltirý, planetanyń qajettilikterin qanaǵattandyrý, adamdardyń quqyqtaryn qurmetteý jáne Birikken Ulttar Uıymynyń belsendiligin arttyrý».
