Talıban Aýǵanstannyń damý strategııasyn bekitti
ASTANA. KAZINFORM — Aýǵanstandaǵy Talıban ýaqytsha úkimeti eldi damytýdyń bes jyldyq strategııasyn bekitti, dep habarlaıdy Amu.tv.
Bul — basqarý, qaýipsizdik jáne ekonomıka salalaryndaǵy aldaǵy jyldarǵa arnalǵan is-qımyl jospary. Bul týraly Kabýlda ótken baspasóz máslıhatynda úkimet qyzmetkeri Zabıýlla Mýdjahıd málimdedi
Ol úkimet bekitken qujat tálipterdiń baqylaýyndaǵy barlyq memlekettik ınstıtýttardy biriktirýge baǵyttalǵanyn, strategııanyń ózi eldiń ishki resýrstary men múmkindikterin paıdalana otyryp júzege asyrylatynyn aıtty.
Strategııa 3 negizgi baǵyt boıynsha qurylymdalǵan:
- basqarý jáne halyqaralyq qatynastar;
- qaýipsizdik jáne qoǵamdyq tártip;
- ekonomıkalyq jáne áleýmettik damý.
Aldaǵy bes jylǵa arnalǵan is-sharalar josparynda aýyl sharýashylyǵy, tabıǵı resýrstar men energetıka, kólik jáne kommýnıkatsııalar, bilim berý, densaýlyq saqtaý jáne qorshaǵan ortany qorǵaý sııaqty 10 negizgi sektor belgilengen.
Sondaı-aq qujatta 15 basym baǵdarlama bar. Atap aıtqanda, ıslam zańdarynyń saqtalýyn qamtamasyz etý, memlekettik sektordy reformalaý, ashyqtyq pen eseptilikti qamtamasyz etý, qoǵamdyq tártip pen shekara qaýipsizdigin nyǵaıtý, qylmystyń aldyn alý jáne jergilikti ózin-ózi basqarý ınstıtýttaryn nyǵaıtý, qalalar men aýyldardy damytý, medıtsınalyq qyzmet kórsetý sapasyn arttyrý jáne halyqty azyq-túlikpen qamtamasyz etý, bilim berý júıesin keńeıtý, telekommýnıkatsııa jáne aqparattyq tehnologııalardy damytý.
— Strategııanyń maqsaty - búkil Aýǵanstannyń teńgerimdi damýyn qamtamasyz etý jáne Talıban mınıstrlikteri men vedomstvolarynyń qyzmetin odan ári úılestirý, - dedi Mýdjahıd.
Buqaralyq aqparat quraldary Modjahıd strategııada qyzdardyń mektepke barýyna ruqsat berý nıetiniń joqtyǵyna túsinikteme bermeı, bul máseleni «ekinshi másele» dep ataǵanyn atap ótti.
Bul rette ol besjyldyq is-sharalar jospary keńirek ulttyq máselelerge baǵyttalǵanyn aıtty.
Mýdjahıd sondaı-aq tálipter konstıtýtsııany ázirleýdi memlekettik basqarýdyń mańyzdy elementi dep sanaıdy ma degen suraqqa naqty jaýap berýden bas tartty.
Aýǵanstannyń damý strategııasyna arnalǵan is-sharada sóz sóılegen ýaqytsha úkimettiń vıtse-premeri molla Abdýl Ǵanı Baradar Ahýnd qujattyń ıslam qaǵıdalary, ǵylymı standarttar men eldegi qalyptasqan jaǵdaılar negizinde ázirlengenin basa aıtty.
Ol barlyq sheneýnikterdi baǵdarlamalardy ázirleý, basymdyqtardy belgileý, shyǵyndardy baǵalaý jáne strategııanyń oryndalýyn baqylaý ortaq jaýapkershilik ekenin moıyndaýǵa shaqyrdy, bul ártúrli vedomstvolardyń turaqty tyǵyz yntymaqtastyǵyn talap etedi.
Eske sala keteıik, Aýǵanstanda sottalǵandar men boryshkerlerge tólqujat berýge tyıym salyndy.