Tálipter Aýǵanstan bıligine qaıta kelgenderiniń besjyldyǵyn atap ótti
ASTANA. KAZINFORM – «Talıban» radıkaldy ıslamshyl qozǵalysy Kabýlǵa kirip, Aýǵanstandaǵy 20 jylǵa jýyq halyqaralyq áskerı rejımniń aıaqtalǵanyna bes jyl tolýyn atap ótti, dep habarlaıdy Euronews.
2021 jyly bılikke qaıta kelgennen beri «Talıban» elde qatań rejım ornatyp, kóptegen aýǵan azamatyn negizgi quqyqtarynan aıyrdy.
Jańa bıliktiń shekteýleri ásirese áıelderge qatty áser etti. Olarǵa er adamnyń erip júrýinsiz qoǵamdyq oryndarǵa shyǵýǵa, bilim alýǵa, sportpen aınalysýǵa jáne kóptegen salada jumys isteýge qatań shekteýler engizildi.
ıÝNESKO málimetinshe, shamamen 2,5 mln aýǵan qyzy orta mektep pen ýnıversıtette bilim alý múmkindiginen aıyrylǵan. «BUU-áıelder» uıymynyń deregine sáıkes, qazir aýǵan áıelderiniń jartysyna jýyǵy úıinen aıyna bir-eki ret qana shyǵady. «Talıban» mundaı saıasat sharıǵat normalaryn ózderiniń túsindirýine sáıkes keletinin málimdeıdi.
Halyqaralyq deńgeıde tálipter Azııa men Taıaý Shyǵystyń birqatar memleketimen beıresmı baılanys ornatty.
Osy rette Eýropalyq odaq ókilderiniń Brıýsselde qozǵalys ókilderimen ótkizgen jýyrdaǵy tehnıkalyq kezdesýi synǵa ushyrady. Kezdesýde aýǵan mıgranttaryn eline qaıtarý máselesi talqylanǵan.
BUU-nyń jıyrmadan astam táýelsiz sarapshysy álem elderiniń úkimetterin táliptermen qarym-qatynasty qalypqa keltirýge asyqpaýǵa shaqyrdy. Olar mundaı qadamdardy adam quqyqtary, eń aldymen áıelder men qyzdardyń quqyqtary salasyndaǵy naqty, ólshenetin jáne táýelsiz túrde rastalǵan ilgerileýmen baılanystyrý qajet ekenin atap ótti.
Aıta keteıik, BUU tálipterden áıelderge qatysty shekteýlerdi toqtatýdy talap etken edi.
