Talgo poıyzy Astanadan Almatyǵa 12 saǵatta jetýi múmkin be - Qarabaev jaýaby

ASTANA. KAZINFORM – Jaz aılarynda poıyzdardyń keshigýi temir jol magıstraldaryn jóndeýge baılanysty boldy. Bul týraly Kólik mınıstri Marat Qarabaev aıtty.

Májilistegi eldiń kólik-logıstıkalyq áleýetin damytýǵa arnalǵan Úkimet saǵatynda depýtat Samat Nurtaza poıyzdardyń kesteden keshigý máselesin kótergen edi.

- Talgo poıyzy keshikpeý úshin ne isteý kerek? Astanadan Almatyǵa 16 saǵat emes 12 saǵatta jetýge múmkindik bola ma? Jalpy poıyzdardyń keshikpeýine ne kedergi?, - degen edi depýtat.

Marat Qarabaevtyń aıtýynsha, jaz ýaqytynda poıyzdardyń keshigýi negizinen joldardy jóndeýge qatysty boldy. 

- Temir jol magıstraldarynyń tozý deńgeıi - 57 paıyzy. Biz bıyl 1 400 shaqyrymda jóndeý jumystaryn júrgizdik. Sol ýaqytta belgili bir ýchaskelerde jazda ǵana jóndeı aldyq. Bul poıyzdardyń keshigýine áser etti. Ol jaıynda ýaqytyly aqparat jetkizdik.

Al 16 saǵattan 12-ge deıin qysqartý degenimiz – jyldamdyqty arttyrý. Ol úshin basqa poıyzdardyń qozǵalysyn (temir jol magıstralinen) alyp tastaý kerek bolady. Qarastyryp kórýge bolady. Biraq, 16-dan 12 saǵatqa qysqarta almaımyz. Tipti, shamaly qysqartýǵa bolatyn shyǵar. Ol úshin júıeni múldem bosatý kerek. Ondaı múmkindik joq, - dedi Marat Qarabaev.

Buǵan deıin temirjol salasynda qandaı iri jobalar iske asyrylyp jatqanyn jazǵan edik.