Endi «Astana-Almaty» baǵytyndaǵy poıyzdar Shý stantsııasyna toqtamaıdy
ASTANA. KAZINFORM — «Jolaýshylar tasymaly» AQ Astana men Almaty qalalary arasynda qatynaıtyn № 4/3 jáne № 10/9 «Talgo» poıyzdarynyń qozǵalys baǵytyna ózgerister engizilgenin habarlaıdy.
2025 jyldyń sáýir aıynan bastap bul poıyzdar Shý stantsııasyna toqtamaı, tikeleı marshrýtpen qatynaıtyn bolady.
Shý stantsııasy — temirjol jelisindegi toraptyq mańyzy bar nysan bolyp sanalady jáne munda lokomotıv aýystyrý jumysy talap etiledi. Atalǵan ózgeris logıstıkany ońtaılandyrýǵa, sondaı-aq, Astana men Almaty arasyndaǵy jol júrý ýaqytyn qysqartýǵa baǵyttalǵan. Sonymen qatar, Shý stantsııasynda jolaýshylar leginiń tómendigi de eskerilgen.
Shý stantsııasynda otyrǵysy nemese túskisi kelgen jolaýshylar úshin balama baǵyttar qarastyrylǵan. Bul baǵyttarda standartty vagondardan quralǵan áleýmettik mańyzy bar poıyzdar, sondaı-aq, kelesi «Talgo» quramdary qatynaıdy:
Astana men Shý arasyndaǵy poıyzdar:
• № 72/71 «Astana — Shymkent»
• № 86/85 «Astana — Shymkent»
Shý men Almaty arasyndaǵy poıyzdar:
• № ½ «Tashkent — Almaty»
• № 11/12 «Shymkent — Almaty»
• № 25/26 «Shymkent — Almaty»
• № 27/28 «Oral — Almaty»
— «Jolaýshylar tasymaly» AQ jolaýshylardan engizilgen ózgeristerge túsinistikpen qaraýdy jáne keltirilgen qolaısyzdyqtar úshin keshirim suraıdy, — delingen «Jolaýshylar tasymaly» AQ baspasóz qyzmeti taratqan aqparatta.
Osyǵan deıin QR TsDIAÓM Telekommýnıkatsııalar komıtetiniń tóraǵasy Damır Seısembekov Qazaqstan poıyzdaryna qashan ınternet qosylatynyn aıtty.