Talǵat Temenov 19 kúnde bir fılmdi túsirip shyqty

Fılmniń tusaýkeseri Halyqaralyq balalardy qorǵaý kúni aıasynda ótip otyr. Rejısser Bıbol esimdi keıipkeri arqyly qazirgi tastandy balalar máselesin kóterip qana qoımaı, otbasy - oshaq qasyndaǵy problemalardy da qozǵaıdy. Áke men balanyń arasyndaǵy qarym-qatynas - aqsha úshin áke-sheshesin qarttar úıine tapsyrýdan taıynbaıtyn adamdardy da kórsetedi. Oqıǵa jelisi alty jasar Bıbol men Qasymxan qarııanyń aınalasynda órbıdi. Bıboldy úsh jasynda anasy saıabaqqa tastap ketken. Sodan ol ınternatqa túsedi. Al mýzyka pániniń muǵalimi, professor Qasymxan atanyń bir ǵana qyzy bar. Alaıda ol aqshaǵa ábden qunyǵyp, ákesine úıin satqyzyp, qarttar úıine toǵytpaqshy bolady. Sol eki arada  qarııa Bıboldy kezdestiredi. Kishkentaı bala qartty qııalyndaǵy atasyna uqsatyp, birden baýyr basyp qalady. Degenmen, Qasymxan qarııa qyzynyń aıtqanynan shyǵa almaı júredi. Tsırkke baryp, adasyp ketken Bıboldy týǵan anasy da teledıdardan kórip, izdeýge kirisedi. Sóıtip, sezimtal ári armanshyl bala týǵan anasynyń da, tipti bóten adamnyń júrek túkpirindegi sezimderin oıatady. Oqıǵanyń qalaı aıaqtalǵanyn qyrkúıek aıynda kórýge bolady.

Rejısser Talǵat Temenovtiń aıtýynsha, fılmniń jabyq tusaýkeseri búgin ótse de, qyrkúıek aıynda ony qalyń kórermenge kórsetý josparlanyp otyr. "Bul fılm 19 kúnde túsirildi. Bıýdjeti de úlken emes. Degenmen, biz adamgershiliktiń basty qundylyqtaryn kórsete bildik dep oılaımyn. Bıboldyń ózin eki myń balanyń ishinen tańdap aldyq", - deıdi Temenov.

Bıboldyń rólin Ánýar Tóleýǵajy somdady. Al Qasymxan qarııany Tóleýbek Aralbaı oınady. Budan bólek, kartınada Qalıbek Qýanyshbaev atyndaǵy Qazaq mýzyka jáne drama teatrynyń biraz áristerin kórýge bolady. Kompozıtory - Tólegen Muxamedjanov. Ánshi Nurjamal Úsenbaevanyń da fılmde óz debıýtin jasaǵanyn atap ótken jón. 

Atalǵan týyndy QR Mádenıet jáne sport mınıstrliginiń tapsyrysy boıynsha túsirildi. Búgingi jabyq kórsetilimge mınıstr Arystanbek Muxamedıuly da qatysty.