Talǵat Sátıev Geologııa komıtetiniń tóraǵasy qyzmetinen bosatyldy

NUR-SULTAN. QazAqparat – QR ekologııa, geologııa jáne tabıǵı resýrstar mınıstriniń buıryǵymen Talǵat Baqtııaruly Sátıev Geologııa komıtetiniń tóraǵasy qyzmetinen bosatyldy, dep habarlaıdy QazAqparat Premer-Mınıstrdiń resmı saıtyna silteme jasap.

Talǵat Sátıev 1973 jyly 7 maýsymda Shyǵys Qazaqstan oblysynda dúnıege kelgen.

Semeı geologııalyq barlaý tehnıkýmyn, Q. Sátbaev atyndaǵy Qazaq ulttyq tehnıkalyq ýnıversıtetin támamdaǵan.

Eńbek jolyn 1999 jyly Semeı qalasyndaǵy «Shyǵysqazjerqoınaýy» memlekettik mekemesi Semeı jer qoınaýyn qorǵaý jáne paıdalaný ınspektsııasynyń jetekshi mamany bolyp bastady.

Ár jyldary Semeı aımaqtyq geologııa jáne jer qoınaýyn paıdalaný ınspektsııasynyń bas maman-ınspektory, basshysy, Semeı qalasyndaǵy «Shyǵysqazjerqoınaýy» Geologııa departamenti basshysynyń orynbasary, basshysy bolyp qyzmet etti.

2014 jyly QR Investıtsııalar jáne damý mınıstrligi Geologııa jáne jer qoınaýyn paıdalaný komıteti tóraǵasynyń orynbasary bolyp taǵaıyndaldy. QR Indýstrııa jáne ınfraqurylymdyq damý mınıstrligi Geologııa jáne jer qoınaýyn paıdalaný komıteti tóraǵasynyń orynbasary, QR Ekologııa, geologııa jáne tabıǵı resýrstar mınıstrligi Geologııa komıteti tóraǵasynyń orynbasary boldy.

2021 jyldan bastap qazirgi kezge deıin QR Ekologııa, geologııa jáne tabıǵı resýrstar mınıstrligi Geologııa komıtetiniń tóraǵasy bolyp qyzmet etti.

Foto: primeminister.kz