Talǵat Rahmanberdi Astana ákiminiń orynbasary bolyp taǵaıyndaldy
ASTANA. KAZINFORM — Talǵat Rahmanberdi Astana ákiminiń orynbasary bolyp taǵaıyndaldy. Ol osyǵan deıin Astananyń Baıqońyr aýdanynyń ákimi qyzmetin atqarǵan.
— Ózge jumysqa aýysýyna baılanysty Eset Baıkenniń ornyna elorda ákiminiń orynbasary bolyp Talǵat Rahmanberdi taǵaıyndaldy. Qazaqstan Respýblıkasy Prezıdenti Ákimshiliginiń jáne qalalyq máslıhat depýtattarynyń kelisimimen bul qyzmetke Talǵat Rahmanberdi bekitildi, — dep habarlady qala ákimdigi.
Ol eńbek jolyn 2004 jyly Qoja Ahmet ıAsaýı atyndaǵy Halyqaralyq qazaq-túrik ýnıversıtetiniń Jastar isi jónindegi komıtetiniń tóraǵasy bolyp bastaǵan.
Ár jyldary «Astana qalasynyń stýdenttik qurylys jáne jastar eńbek jasaqtarynyń shtaby» qoǵamdyq birlestigin basqardy. Sondaı-aq Qazaqstan Respýblıkasy Bas prokýratýrasy ınstıtýtynyń (Astana qalasy) qylmystyq protsess zańdylyǵy men jedel-izdestirý qyzmetin qadaǵalaý boıynsha biliktilikti arttyrý basqarmasynda aǵa prokýror, Astana qalasy Jastar saıasaty máseleleri basqarmasynyń basshysy jáne ózge de qyzmetterdi atqarǵan.
2016 jyldyń sáýirinen 2019 jyldyń naýryzyna deıin Astananyń Saryarqa aýdany ákiminiń orynbasary boldy. 2019 jyldyń sáýir aıynan bastap Astana ákimi apparaty basshysynyń orynbasary qyzmetin atqardy.
2019 jyldyń tamyzynan 2023 jyldyń qyrkúıegine deıin Astana qalasynyń Qoǵamdyq damý basqarmasy men Іshki saıasat basqarmasyn basqardy, sondaı-aq qala ákiminiń keńesshisi boldy.
2023 jylǵy 18 qazannan bastap Baıqońyr aýdanynyń ákimi qyzmetin atqardy.
Astana ákimi Jeńis Qasymbek Talǵat Rahmanberdige qalany júıeli damytýǵa baǵyttalǵan birqatar mindet júktedi.
Eske salaıyq, buǵan deıin Eset Baıken Ulytaý oblysynyń ákimi bolyp taǵaıyndalǵanyn habarlaǵanbyz.
