Talǵat Musabaev petropavldyq stýdentter men ustazdardy marapattady
PETROPAVL. QazAqparat - Petropavlda «Bilim men juldyz aılaǵy» atty syıaqyny Halyq qaharmany, ǵaryshker Talǵat Musabaev tabys etti, dep habarlaıdy QazAqparat tilshisi.
Soltústikqazaqstandyq ǵaryshker, Keńes odaǵynyń batyry Aleksandr Vıktorenko atyndaǵy dástúrli syıaqyǵa bıyl Petropavldaǵy qurylys-ekonomıkalyq kolledjiniń 12 stýdenti men 8 ustazy laıyqta dep tanyldy. Úzdikterdi avıatsııa general-leıtenanty, Halyq qaharmany Talǵat Musabaev marapattady. Jıynǵa, sondaı-aq Qazaqstan halqy Assambleıasy Keńesiniń múshesi, SQO Qurmetti azamaty Anatolıı Bashmakov ta qatysty.
Aleksandr Vıktorenko 1947 jyly 29 naýryzda Soltústik Qazaqstan oblysy qazirgi Shal aqyn aýdanyndaǵy Olgınka aýylynda dúnıege kelgen. Orynbordaǵy joǵary áskerı avıatsııalyq ýchılışeniń túlegi. Tórt ret ǵaryshqa ushyp, alty ret ashyq kosmosqa shyqqan. Kolledjde stýdentter ǵaryshkerdiń ómirbaıanymen jaqsy tanys. Óıtkeni munda kosmonavtıka mýzeıi bar.
Ǵaryshker atyndaǵy «Bilim men juldyz aılaǵy» syıaqysy jıyrma jylǵa jaqyn kolledjdiń oqýda, óner men sport salasynda jaqsy nátıje kórsetip júrgen stýdentterge berilip keledi.
«Búgin ózimniń jaqyn dosymnyń atyndaǵy syıaqyny tabystaýǵa arnaıy keldim. Ókinishke oraı Aleksandr Stepanovıch densaýlyǵyna baılanysty ózi kele almady. Barlyq stýdentter men oqytýshylardy marapattarymen quttyqtaımyn», - dedi ǵaryshker Talǵat Musabaev.
Talǵat Musabaev qalalyq №14 mekteptiń oqýshylarymen áńgimelesip, olardyń saýaldaryna jaýap berdi.
