Talǵat Musabaev Qyzylorda oblysyndaǵy tikushaq apatyna qatysty pikir bildirdi
NUR-SULTAN. QazAqparat - Senat depýtaty Talǵat Musabaev tilshilerge Qyzylorda oblysynda tikushaq apatynyń keıbir mán-jaıyn aıtyp berdi, dep habarlaıdy QazAqparat tilshisi.
«Qorǵanys mınıstrliginiń ótkizgen arnaıy jattyǵýy aıasynda tikushaq áýege kóterilgen. Bul top Aqtaýdan Shymkentke qaraı baǵyt alǵan, sondaı-aq onyń osy aralyqta Beıneýde, keıinnen «Kraınıı» (Baıqońyr) áýe aılaǵynda qonýy josparlanǵan. Baıqońyrdan ushyp shyqqannan soń birneshe mınýttan keıin dıspetcherlik qyzmettiń radıolokatorlaryndaǵy tikushaqtyń belgisi joǵalyp ketken. Keıinnen tikushaqtyń apat bolǵany anyqtaldy», - dedi Talǵat Musabaev Senattyń jalpy otyrysynan keıin tilshilerdiń saýalyna jaýap bere otyryp.
Sonymen qatar tikushaqtyń ushýy qıyn meteorologııalyq jaǵdaıda ótkenin atap ótti.
«Bul kúrdeli áýe sapary erekshe tańba qaldyrady. Men ony ushqysh retinde aıtyp otyrmyn. Osyndaı qıyn jaǵdaıda ushý qandaı aýyrtpalyq túsiretinin jaqsy bilemin. Ekıpaj barlyq qajetti sharany qabyldady. Tehnıkanyń ózindik ereksheligi bar, ıaǵnı avıatsııa - ol eń qıyn kóliktiń túri. Sondyqtan ekıpajǵa baılanysty emes osyndaı qaıǵyly oqıǵalar bolady», - dedi senator.
Osy oraıda ol qylmystyq is aıasynda erekshe tergeý amaldary júrgiziletinin, Qorǵanys mınıstrliginiń arnaıy komıssııasy jumys istep jatqandyǵyn atap ótti.
Eske sala ketsek, QR ІІM TJK baspasóz qyzmeti buǵan deıin Qyzylorda oblysynyń Jalaǵash aýdanynda MI-8 tikushaǵy apatqa ushyraǵanyn habarlaǵan bolatyn.
Apat saldarynan tikushaq bortyndaǵy 13 adam qaza tapty.
