Talǵat Musabaev Qazaqstandaǵy áýe apattaryna qatysty pikir bildirdi
ASTANA. QazAqparat - Áýe saparlarynyń qaýipsizdigin qamtamasyz etý úshin biryńǵaı memlekettik organdy qurý kerek. Osy jaıynda Parlament Senatynyń depýtaty Talǵat Musabaev málim etti, dep habarlaıdy QazAqparat.
«Avıatsııa óte kúrdeli qurylym. Ózderińiz bilesizder, alǵan bilimim boıynsha avıatsııalyq ınjenermin, joǵary dárejeli ushqyshpyn. Osydan keıin synaýshy ǵaryshker biliktiligin aldym. Bul rette barlyǵy kabınada otyrǵan ushqysh pen ekıpajǵa ǵana qatysty emes, ıaǵnı munyń barlyǵy jerdegi qurylymdardyń, tehnıkalyq jasaqtaý jáne basqa da aýqymdy keshenniń jumysyn qamtıdy»,- dedi Talǵat Musabaev tilshilerge bergen suhbatynda.
Osy oraıda depýtat QR IDM Azamattyq avıatsııa komtetine kóbirek nazar aýdarý kerektigin atap ótti.
«Meniń oıymsha, elimizde áýe saparlary qaýipsizdigin qamtamasyz etýdi baqylaıtyn biryńǵaı memlekettik organdy qurý kerek. Basqa memleketterde osyndaı organdar bar. Atalǵan organ avıatsııanyń barlyq túrlerindegi áýe tehnıkanyń, ushqyshtar quramyn, dıspetcherlik ujymnyń, ınjenerlik quramnyń jaǵdaıyn tekserý boıynsha baqylaýshy qyzmetti iske asyra alady. Osy oraıda elimizdiń avıatsııasynda mundaı organdy qurý qajet jáne oǵan qandaı da bir mınıstrliktiń baqylaýynda bolmaıtyndaı quqyq berý kerek», - dedi Musabaev.
Onyń sózine qaraǵanda, bul baqylaýshy organ Qazaqstannyń barlyq avıatsııasyn tekserýge qaýqarly bolýy tıis.
«Avıatsııada qaýipsizdikti qamtamasyz etý máselesi únemi ózekti taqyryptardyń biri boldy. Keńestik kezeńde saladaǵy barlyq qyzmetterdiń ózara is-qımyly bolǵandyqtan, ushaq apattary jıi qaıtalanbaıtyn. Al osyndaı apattardyń jıileýi kóńil kónshitpeıtin jaǵdaı. Bul óz kezeginde áýe saparlary qaýipsizdigine nazar aýdarý qajettigin ańǵartady», - deıdi depýtat.
Sóz sońynda senator aldaǵy ýaqytta atalǵan organdy qurý boıynsha usynystar eskerilip otyrǵanyn atap ótti.
Eske salaıyq, 3 qazan kúni Almaty-Shymkent baǵytynda sanıtarlyq avıareısin oryndaǵan «AN-28» ushaǵy saǵat 18:47-de Almatydan 28 shaqyrym qashyqtyqta rodardan joǵalyp ketti. Sosyn saǵat 19.15-te ushaq Almaty oblysy Іle aýdanynyń Mejdýrechınsk aýyly mańynda apatqa ushyrap, órtengeni habarlandy. Bortta bolǵan 5 adam qaza boldy.
