Talǵat Musabaev avıatsııalyq baqylaý salasyna ózgerister usyndy
ASTANA. QazAqparat - Parlament Senatynyń jalpy otyrysynda depýtat Talǵat Musabaev Qazaqstandaǵy azamattyq avıatsııa salasyndaǵy qaýipsizdik máselesin kóterdi, dep habarlaıdy QazAqparat.
«Qazirgi ýaqytta elimizdiń avıatsııasynyń azamattyq jáne basqa túrlerinde alańdaıtyn jaǵdaı qalyptasyp otyr. Buǵan dálel retinde sońǵy kezderde adamdar qurban bolǵan apattardy aıtýǵa bolady. Álemdik tájirıbege súıensek, áýe saparlary qaýipsizdigin qamtamasyz etetin sertıfıkattaý men qadaǵalaý sekildi negizgi memlekettik qyzmetter bir vedomstvoda shoǵyrlanbaýy tıis ekendigin kórsetip otyr. Sebebi qabyldanǵan sharalar men sheshimderdiń obektıvtiligi eskerilmeıdi, sonyń saldarynan áýe saparlarynyń qaýipsizdigi tómendeıdi. Azamattyq avıatsııa salasyna toqtalsaq, Qazaqstanda atalǵan qyzmet QR IDM Azamattyq avıatsııa komıtetine tıesili. Osy arqyly tek bir ǵana organ salada ózi sertıfıkattaıdy, keıinnen dál óziniń jumysyna qadaǵalaý júrgizedi»,-dep atap ótti T. Musabaev depýtattyq saýalynda.
Bul turǵyda depýtattyń sózine qaraǵanda, baqylaý men tekserý qyzmetterin tergeý sharalarymen biriktirip, áýe saparlarynyń qaýipsizdigin baqylaý jáne avıatsııalyq oqıǵalardy tergeýdiń jeke memlekettik organyn qurý kerek.
«Álemdik tájirıbege qarasaq, sertıfıkattaý qyzmetterin baqylaý men qadaǵalaýdan ajyratý kerek. Bul óz kezeginde qabyldanatyn sheshimderdiń obektıvtiligin qamtamasyz etedi, sondaı-aq áýe saparlarynyń qaýipsizdigin arttyrýda ózge de ońtaıly qadamdarǵa jol ashady»,-dedi T. Musabaev.
