Talǵat Musabaev avıatsııadaǵy oqıǵalardy tekserýge qatysty usynys aıtty

NUR-SULTAN. QazAqparat - Senat depýtaty Talǵat Musabaev Premer-Mınıstrdiń atyna joldaǵan saýalynda azamattyq avıatsııa jáne ushýdy uıymdastyrý salasyndaǵy qaýipsizdik máselelerin qozǵady, dep habarlaıdy QazAqparat tilshisi.

Senator zań boıynsha azamattyq avıatsııada sertıfıkattaý, qadaǵalaý jáne baqylaýmen Indýstrııa jáne ınfraqurylymdyq damý mınıstrliginiń Azamattyq avıatsııa komıteti aınalysýy kerek ekenin atap ótti.

Alaıda, bul memlekettik fýnktsııalar is júzinde ishki qujattar negizinde sheteldik azamat basqaratyn «Qazaqstannyń avıatsııalyq ákimshiligi» AQ kommertsııalyq kompanııasyna berildi.

Senatordyń pikirinshe, atalǵan saladan ózin-ózi osylaı shettetý faktisi mundaı memlekettik organnyń bolý oryndylyǵy týraly máseleni týyndatady.

«Máseleniń sheshimin zańdy arnaǵa baǵyttaýdy usynamyz. Azamattyq avıatsııadaǵy qadaǵalaý jáne baqylaý jónindegi memlekettik fýnktsııalardy Azamattyq avıatsııa komıtetine qaıtarý qajet dep sanaımyz. Al «Qazaqstannyń avıatsııalyq ákimshiligi» AQ qurylǵandyqtan, oǵan tek sertıfıkattaý jónindegi fýnktsııalardy qaldyrý nemese oǵan kommertsııa sýbektisi emes, barlyq týyndaıtyn zańnamalyq saldary men jaýapkershiligi bar memlekettik organ mártebesin berý, oǵan memlekettik fýnktsııalardy oryndaýdy júkteý qajet», – dep atap ótti senator.

Ol óziniń depýtattyq saýalynda avıatsııalyq jáne azamattyq avıatsııadaǵy oqıǵalardy tekserýdi Tótenshe jaǵdaılar mınıstrligine nemese táýelsiz halyqaralyq aımaqtyq tergeý organdaryna berýdi qarastyrý qajet ekenin aıtty.