Talǵat Musabaev amerıkandyq Aviation Week & Space Technology jýrnalyna Qazaqstannyń ǵarysh salasyndaǵy jetistikteri týraly suhbat berdi

Ǵarysh ónerkásibi týraly jazatyn amerıkandyq avıatsııalyq jýrnal álem elderine taraıdy jáne ol aptasyna 100 myń danamen shyǵady. «Bizdiń basylym Qazǵaryshtyń basqa ǵarysh agenttikterimen aradaǵy halyqaralyq yntymaqtastyǵy týraly, Qazaqstannyń ǵarysh salasynyń búgingi damý joly týraly tereńirek bilgisi keledi», - dedi L. Fransıs kirispe sózinde.

Jýrnalıstiń «Qazsat» jerserikteri týraly saýalyna bergen jaýabynda «Qazǵarysh» basshysy, 2011 jyldyń maýsym aıynda Baıqońyrdan ekinshi qazaqstandyq jerseriktiń ushyrylatyny týraly aıtty jáne «Qazsat» serııasyndaǵy úshinshi ǵarysh apparatynyń jasalý jospary týraly áńgimelep berdi.

T.Musabaev sondaı-aq «Baıqońyr» ǵarysh aılaǵyn aktsıonerlendirý múmkindigi týraly áńgimege túsindirme berdi: «Baıqońyr» ǵarysh aılaǵy aktsıonerlendirilmeıdi, sebebi ol Qazaqstan Respýblıkasynyń menshigi bolyp tabylady jáne ol Reseı Federatsııasyna 2050 jylǵa deıin jalǵa berilgen. «Biz bul máseleni telefon arqyly «Reseıǵarysh» agenttiginiń basshysy Anatolıı Permınovpen talqyladyq. Keıbir buqaralyq aqparat quraldary dabyra etip jarııalaǵandaı, «Baıqońyrdy aktsıonerlendirý týraly eshqandaı málimdeme jasamaǵanyn aıtty», - dedi óz suhbatynda Ulttyq ǵarysh agenttiginiń basshysy.

«Qazǵarysh» basshysy Qazaqstannyń ǵarysh salasyndaǵy josparlary týraly áńgimelep berdi jáne agenttiktiń búginde eldiń ulttyq ǵarysh salasyn qurý baǵytynda kópvektorly jumys júrgizip otyrǵanyn atap kórsetti.

Óz kezeginde L.Fransıs myrza, mazmundy suhbaty úshin Ulttyq ǵarysh agenttiginiń tóraǵasyna alǵys bildirdi jáne Aviation Week& Space Technology jýrnalyndaǵy Qazaqstan týraly osynaý alǵashqy maqala dúnıejúzi oqyrmandaryna Qazaqstannyń ǵarysh derjavalarynyń qatarynan óz ornyn alýǵa degen talpynysy týraly bilýge múmkindik beretindigine senim bildirdi.