Talǵat Lastaev elde sheteldik pılottardyń qaptap ketkeni týraly synǵa jaýap berdi

Úkimet otyrysynan keıin ótken baspasóz máslıhatynda Azamattyq avıatsııa komıtetiniń tóraǵasy Talǵat Lastaev elde sheteldik pılottardyń qaptap ketkeni týraly synǵa jaýap berdi, dep habarlaıdy QazAqparat tilshisi.

«Birinshiden, men ózim otandyq ushaqtarmen ushýdan múldem qoryqpaımyn. Ekinshiden, álemdegi áýe baılanysynyń qaýipsizdigin ólsheıtin kórsetkish bar. Ol halyqaralyq azamattyq avıatsııa uıymy - ІSAO-nyń baǵasy. Sol baǵa boıynsha bizdegi ushýdyń qaýipsizdik deńgeıi 82 paıyz. Ol bizdiń TMD elderiniń arasynda eń bıik kórsetkish sanalady. Tipti Ispanııa, Chehııa sııaqty Batys Eýropa memleketteriniń kórsetkishterimen sáıkes. Aldaǵy aýdıtten 90 paıyz kórsetkishke jetý degen maqsat qoıyp otyrmyz. Sondyqtan bizdegi ushý qaýipsizdiginiń deńgeıi bıik dep sanaýǵa bolady», - dedi komıtet basshysy.

Talǵat Lastaev ásirese «Eır Astana» kompanııasynda sheteldik pılottar kóp ekenin aıtady.

«Jalpy bizdiń salada 20 myńnan astam adam jumys isteıdi. Sonyń ishinde «Eır Astanada» 90-100-diń arasynda sheteldik pılottar bar. Biraq onyń sany jyl saıyn azaıady. Óıtkeni bizde otandyq pılottardy daıarlaıtyn birneshe baǵdarlama bar. Ár áýe kompanııasy óz pılottaryn ózderi daıyndap jatyr. Jyl saıyn óz mamandarymyzdyń sany ósip jatyr. Biraq avıatsııa salasynda sheteldik pılottardy paıdalaný halyqaralyq praktıka bolyp esepteledi. Sol sebepti ol eshqandaı erekshe jaıdaı bolyp sanalmaıdy», - dedi komıtet tóraǵasy.

Buǵan deıin belgili avıator maman Abyl Kekilbaev BAQ-qa bergen suhbatynda qazaqstandyq ushaqtarmen ushýdan qorqatynyn aıtqan edi. Onyń sózinshe, eldegi bilikti mamandardyń bári arab elderine ketip, ornyn shetelden kelgen mamandar basyp jatyr.