Talǵat Lastaev áýejaılardy qysqa daıyndaý jóninde tapsyrma berdi
ASTANA. KAZINFORM – Kólik vıtse-mınıstri azamattyq avıatsııa sýbektileriniń qysqy navıgatsııaǵa daıyndyǵy jóninde keńes ótkizdi.
Qazaqstan Respýblıkasy Kólik vıtse-mınıstri Talǵat Lastaevtyń tóraǵalyǵymen elimizdegi barlyq áýejaılar men áýe kompanııalardyń birinshi basshylarynyń qatysýymen 2026–2027 jyldardaǵy kúzgi-qysqy kezeńge daıyndyq máseleleri boıynsha keńes ótti.
Keńes barysynda Kólik vıtse-mınıstri qysqy kezeńde azamattyq avıatsııanyń qaýipsiz ári úzdiksiz jumysyn qamtamasyz etýge baǵyttalǵan birqatar tapsyrma berdi.
Atap aıtqanda, áýejaı ınfraqurylymynyń, aerodromdyq jáne arnaıy tehnıkanyń, sondaı-aq personaldyń kúrdeli aýa raıy jaǵdaılarynda jumys isteýge tolyq daıyndyǵyn qamtamasyz etý tapsyryldy. Jabdyqtarǵa tehnıkalyq qyzmet kórsetýdi ýaqtyly júrgizý jáne olardyń jaramdylyǵyn tekserý, áýejaılardy kóktaıǵaqqa qarsy reagentterdiń jáne basqa da qajetti shyǵys materıaldarynyń jetkilikti qorymen qamtamasyz etý máselelerine erekshe nazar aýdaryldy.
Sonymen qatar ushý-qoný jolaqtary men basqa da aerodrom jabyndaryn qar men muzdan ýaqtyly tazartýǵa arnalǵan tehnıkanyń daıyndyǵyn qamtamasyz etý, sondaı-aq áýe kemelerin muzdanýǵa qarsy óńdeý jumystaryn uıymdastyrý boıynsha tapsyrmalar berildi.
Vıtse-mınıstr barlyq daıyndyq sharalaryn aldyn ala oryndaýdyń jáne áýejaılar men áýe kompanııalardyń kúzgi-qysqy kezeńdegi jumysqa daıyndyǵyn turaqty baqylaýda ustaýdyń mańyzdylyǵyn atap ótti.
