Talǵat Qalıev Ulttyq keńes otyrysynyń negizgi nátıjelerin atady
«Jumys toptarynyń otyrystarynda jasalǵan usynystardyń kópshiligi qoldaý tapty dese de bolady. Keıingi aılarda múddeli memlekettik organdardyń, Prezıdent Ákimshiliginiń basshylyǵymen ótkizilgen kezdesýlerde aldyńǵy otyrystardyń usynystary keńinen talqylanǵan bolatyn. Saıası modernızatsııalaý tobynyń nátıjeleriniń biri - mıtıngiler týraly habarlaý júıesine kóshý. Bul óte mańyzdy qadam», - dep jazdy Talǵat Qalıev Facebook-te.
Sarapshynyń aıtýyna qaraǵanda, saıası partııalardyń múshelerin tirkeýdi 40 myńnan 20 myńǵa azaıtý isine de nazar aýdarǵan abzal.
«Bul kóp pe, az ba? 17 óńirge eseptep bólseńiz, bir partııa úshin 1176 adam kerek degen sóz. Blogerlerdiń jazylýshylary myńdap ketken áleýmettik jeliniń zamanynda óz partııańyzdyń qataryn op-ońaı jınap alýǵa bolady. Oppozıtsııalyq partııa ókilderine Parlamenttegi jetekshi pozıtsııalar beriletin boldy. Májilistegi komıtettiń basshysy laýazym qarapaıym depýtattyq mandattan góri kez kelgen partııa úshin edáýir jol ashyp tur. Sózsiz, mundaı jaǵdaıda Parlament pikirtalasqa beıim ári batyl bolýy tıis», - dedi ol.
Talǵat Qalıev sonymen qatar Memleket basshysynyń Esep komıteti aýdıtiniń jarııaly bolýy kerektigi týraly sheshimin aıtyp ótti.
«Jańashyldyqta ekonomıkalyq sıpat basym desek te, bul sheshimniń saıası mańyzy da joǵary. Sebebi, osy ózgeris azamattyq sektordyń quzyretin arttyrady. Jala jabý týraly baptyń dekrımınalızatsııalanýy otandyq jýrnalısterdi jigerlendire túsýi kerek», - dedi Talǵat Qalıev.
