Talǵat Qalıev: Elbasy maqalasyndaǵy mindetterdi oryndaı alsaq, senimdi qoǵam qalyptastyrýǵa múmkindikter týatyny haq
ASTANA. QazAqparat - Eger aldymyzǵa júktelgen mindetterdi júzege asyra alsaq, onda shyn máninde bizde jańǵyrýǵa, progressıvtik, ózine senimdi qoǵam qalyptastyrýǵa múmkindikter týatyny haq. Búgin «Egemen Qazaqstan» respýblıkalyq gazetinde shyqqan Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasyna baılanysty saıasattanýshy Talǵat Qalıev osyndaı pikir bildirdi, dep habarlaıdy QazAqparat.
«Eshqandaı da ásireleýsiz, kúshti maqala. Kez kelgen halyq úshin naqty ári anyq baǵyt, oǵan qol jetkizýdiń algorıtmderi qajet. Abstraktili formýlalar men zor urandar emes, ár maqsatqa jetýdiń qarapaıym ári uǵynyqty joly qajet. Memleket - bul kompanııalar da, bankter de, zaýyt-fabrıkalar men bılik ınstıtýttary da emes, memleket - bul ult, qoǵam jáne osynyń bárin quraıtyn adamdar. Jáne bir iske jumyldyratyn baǵyt bolmasa, onda olar qoǵam men ult deýge de kelmeıtin baǵdarsyz tobyrǵa aınalady», - dep jazady Talǵat Qalıev óziniń áleýmettik jelidegi paraqshasynda.
Bul rette saıasattanýshy kóptegen memleketterdiń dál osyndaı joldan ótkenin alǵa tartady. Máselen, onyń sózine qaraǵanda, búgingi Túrkııa úshin bir kezderi óziniń ımperııalyq pıǵylynan bas tartyp qana qoımaı, ondaı kompleksti eńserý kerek boldy. Atatúrk sol kezeńderdegi progressıvtik eýropalyq qundylyqtarǵa jurtty kúshpen daǵdylandyryp, ony sanada ǵana emes, tipti kúndelikti ómirde de engizýge asa mán berdi. Máselen, eýropalyq kıim kııýge de májbúrlegen. Japon ımperatory da samýraılardyń burymyn qıyp, atam zamanǵy ǵuryptardan qutylýǵa tyrysqan. Qytaı óziniń mádenı revolıýtsııasyn bastan ótkerdi.
«Búgingi kúni osylardyń barlyǵy ózderiniń mádenı erekshelikteri men qundylyqtaryn álemge tanytqan tabysty ári zamanaýı ultqa aınalyp otyr. Túriktiń kishipeıildigi túrik áleýetiniń negizgi faktorlarynyń birine aınaldy, japonnyń qaısarlyǵy korporatıvtik mádenıettiń negizine endi, al qytaılyqtar tózimdiliginiń arqasynda memleketin birtindep tehnologııa ortalyǵyna aınaldyryp keledi. Osynyń báriniń ózeginde halyqtyń ozyq dástúrlerine, onyń genetıkalyq jáne biregeı mádenıetine negizdelgen, óziniń biregeı jetistikter modeli, ulttyń jańǵyrǵan sanasy jatyr», - dep atap ótedi Talǵat Qalıev.
Onyń paıymynsha, Elbasynyń aǵymdaǵy Joldaýynda jarııalanǵan jańǵyrtýdy sananyń jańǵyrtýynsyz júzege asyrý da múmkin emes. Sondyqtan da, salaýatty, naqty baǵdar ustanǵan qoǵam ǵana kez kelgen ekonomıkalyq jáne saıası mindetterge qol jetkize alady.
«Negizgi áńgime ultty jańǵyrtý týraly, bizdiń ózimizdiń qundylyqtar men ozyq dástúrlerimizge negizdelgen onyń basty qundylyqtary men baǵyttary týraly bolyp otyr. Bizdiń ózimizge de zamanaýı ulttyq mádenıet kerek, jetistikti paıymdaıtyn óz jolymyz, oǵan jetýdiń jarqyn ári tóte joly qajet. Ulttyq ıdeıa abstraktili, sosyn onyń qarapaıym qadamdaryn uǵynyqty etip bólshektemese, ol qol jetpeıtin mejege aınalýy da múmkin. Bul úshin qoǵamnyń árbir múshesi óz ornyn taba alatyndaı is-qımyl jospary kerek», - dedi Talǵat Qalıev.
Іs-qımyl josparyn aıta kele, saıasattanýshy birinshi kezekte adamı kapıtalǵa, básekege qabiletti ultqa arqa súıeý qajettigin eske salady.
«Bizdiń sheteldegi qandastarymyzdyń jetistiginiń ózi bizdegi ulttyq áleýettiń meılinshe baı ekendigin kórsetip otyr. Alaıda, endigi kúni osyndaı tulǵalyq jetistikterdi jalpyulttyq jetistikterge qaraı transformatsııalaıtyn ýaqyt keldi, tutastaı halyqtyń básekege qabilettiligin arttyrý kerek. Eger biz aldymyzǵa júktelgen mindetterdi júzege asyra alsaq, onda shyn máninde bizde jańǵyrýǵa, progressıvtik, ózine senimdi qoǵam qalyptastyrýǵa múmkindikter týatyny haq», - deıdi saıasattanýshy.
