Talǵat Qalıev Aýǵanstan máselesine qatysty BUU otyrysyna qatysady
ASTANA. QazAqparat – 2023 jylǵy 1-2 mamyr aralyǵynda Doha qalasynda Birikken Ulttar Uıymy bas hatshysy Antonıý Gýterrısh BUU-ǵa múshe memleketterdiń Aýǵanstan boıynsha arnaıy ókilderimen kezdesedi. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.
«Atalǵan kezdesýdiń maqsaty – Aýǵanstandaǵy ahýal boıynsha ortaq maqsattar tóńireginde halyqaralyq ózara is-qımyldy jandandyrý. Qazaqstan Respýblıkasy atynan bul is-sharaǵa QR Prezıdentiniń Aýǵanstan boıynsha Arnaıy ókili – Qazaqstan Syrtqy ister mınıstrliginiń Erekshe tapsyrmalar jónindegi elshisi Talǵat Qalıev qatysady», - dedi A. Smadııarov elordada ótken baspasóz máslıhatynda.
Budan buryn habarlanǵandaı, 2023 jylǵy 26-27 sáýirde Qazaqstan Premer-Mınıstriniń orynbasary – Syrtqy ister mınıstri Murat Nurtileý bastaǵan qazaqstandyq delegatsııa Sıan qalasynda ótetin «Ortalyq Azııa –Qytaı» dıalogtyq formattaǵy Syrtqy ister mınıstrleriniń 4-shi keńesine qatysady.
Sonymen qatar osy aptada Qazaqstan Premer-Mınıstri Álıhan Smaıylovtyń Iran Islam Respýblıkasyna sapary ótedi.
