Talǵat Ǵazızov «Kazakh Tourism» basqarma tóraǵasy qyzmetine taǵaıyndaldy

ASTANA. KAZINFORM - Dırektorlar keńesiniń sheshimimen «Kazakh Tourism» UK» AQ basqarma tóraǵasy laýazymyna Talǵat Ǵazızov taǵaıyndaldy, dep habarlaıdy kompanııanyń baspasóz qyzmeti.

Talǵat Ǵazızov 1986 jylǵy 21 qazanda Astana qalasynda dúnıege kelgen. Ol E.A. Bóketov atyndaǵy Qaraǵandy memlekettik ýnıversıtetin, Ál-Farabı atyndaǵy Qazaq ulttyq ýnıversıtetiniń magıstratýrasyn, «Bolashaq» baǵdarlamasy boıynsha Maıamı ýnıversıtetin támamdaǵan.

Eńbek jolyn akademık E. A. Bóketov atyndaǵy Qaraǵandy memlekettik ýnıversıtetiniń dúnıejúzi tarıhy jáne halyqaralyq qatynastar kafedrasynyń oqytýshysy qyzmetinen bastaǵan.

Keıin QR Mádenıet jáne aqparat mınıstrliginiń vedomstvolyq uıymdarynda túrli pozıtsııalarda eńbek etti.

«Zerde» ulttyq ınfokommýnıkatsııalyq holdıngi» AQ aqparattyq qoldaý jáne PR ilgeriletý departamentiniń dırektory qyzmetin atqardy. Amanat partııasy ortalyq apparatynyń kommýnıkatsııalar jáne taldaý departamentin basqardy. «AQGroup» kompanııalar tobynda basqarýshy dırektor, «Qazposhta» AQ fılıaly dırektorynyń orynbasary boldy.

Talǵat Ǵazızov «Kazakh Tourism» UK» AQ Basqarma tóraǵasy laýazymyna taǵaıyndalǵanǵa deıin 2023 jyldan bastap «Qazposhta» AQ Basqarýshy dırektory-Basqarma múshesi qyzmetin atqardy.

Osyǵan deıin Astananyń Eýropanyń qoljetimdi týrızm jelisine resmı túrde qosylǵany týraly jazdyq.