Talǵat Ermegııaevke merziminen buryn bosap shyǵýǵa taǵy da ruqsat berilmedi

QONAEV. KAZINFORM – «Astana EKSPO-2017» ulttyq kompanııasynyń burynǵy basshysy Talǵat Ermegııaevti shartty túrde merziminen buryn bosatýdan taǵy da bas tartyldy.

2025 jyldyń 14 shildesinde Alataý qalalyq soty Ermegııaevti shartty túrde merziminen buryn bosatýdan bas tartqan edi.

Búgin Almaty oblystyq soty osy sot qaýlysyna qatysty advokattyń jeke shaǵymyn qarady. Sottalýshynyń advokaty atalǵan qaýlynyń kúshin joıyp, sottalýshyny shartty túrde merziminen buryn bosatý týraly jańa sheshim shyǵarýdy suraǵan. Alaıda prokýror qaýlyny ózgerissiz qaldyrýdy talap etti.

Sot alqasy sottalýshynyń shartty túrde merziminen buryn bosatý týraly ótinishin qanaǵattandyrýdan bas tartý jónindegi birinshi satydaǵy sot qaýlysyn joıýǵa negiz tappady.

– Ótinishti qaraý barysynda is júrgizý jáne materıaldyq quqyq normalary buzylǵan joq. Sottalýshynyń barlyq sıpattamalary, sonyń ishinde keltirilgen zalaldy óteýi, tıisti túrde baǵalandy. Sheshimdi joıýǵa negizder anyqtalǵan joq, – dep málimdedi Almaty oblystyq sotynyń baspasóz qyzmeti.

Qaýly zańdy kúshine endi.

Eske salaıyq, «Astana EKSPO-2017» Ulttyq kompanııasynyń burynǵy basshysy Talǵat Ermegııaev 2015 jyldyń 12 maýsymynda úıqamaqqa alynǵan.

2016 jyly 9 maýsymda ol Astana qalasynyń qylmystyq ister jónindegi aýdanaralyq mamandandyrylǵan sotynyń úkimimen 14 jylǵa bas bostandyǵynan aıyrylǵan bolatyn. Sondaı-aq sot T.Ermegııaevten «Astana EKSPO-2017» kompanııasyna 5,9 mlrd teńgeni qaıtarý jóninde úkim shyǵardy.

2017 jyly «Astana EKSPO-2017» ulttyq kompanııasynyń burynǵy basshysy Talǵat Ermegııaevke jazasyn óteý úshin qolaıly jaǵdaı jasaǵan túrmeniń 16 laýazymdy tulǵasy jaýapqa tartyldy.

2018 jyly Talǵat Ermegııaevke qamqorlyq jasaǵan Astanadaǵy kolonııa basshysy sottaldy.