Talǵat Ermegııaevke qamqorlyq jasaǵandar jazalandy - ІІM
ASTANA. QazAqparat - «Astana EKSPO-2017» ulttyq kompanııasynyń burynǵy basshysy Talǵat Ermegııaevke jazasyn óteý úshin qolaıly jaǵdaı jasaǵan túrmeniń 16 laýazymdy tulǵasy jaýapqa tartyldy.
Bul jaıynda QR ІІM Memlekettik til jáne aqparat departamentiniń dırektory Almas Sadýbaev málim etti, dep habarlaıdy QazAqparat.
Onyń aıtýynsha, Іshki ister mınıstrligi Astana qalalyq qylmystyq atqarý júıesi departamenti ETs 166/10 mekemesiniń resmı tulǵalaryna qatysty sottalýshy T.A.Ermegııaevke qamqorlyq jasaý jáne onyń jazasyn óteýi úshin qolaıly jaǵdaı jasaý faktisi boıynsha qyzmettik tekserý júrgizgen.
«Aǵymdaǵy jyldyń 20 jeltoqsanynda ІІM buıryǵymen zańdylyq pen qyzmettik tártipti buzýǵa jol bergeni úshin 16 laýazymdy tulǵa túrli tártiptik jazaǵa tartyldy. Onyń ishinde bireýi teris qylyqtary úshin ishki ister organdarynan shyǵarylyp, 12-si laýazymdy qyzmetterinen bosatyldy. ІІM Qylmystyq atqarý júıesi komıtetiniń tóraǵasy, ádilet polkovnıgi A.Bazylbekov pen onyń orynbasary ádilet polkovnıgi B.Tóremuratovke qyzmetine tolyq saı kelmeıtindigi eskertildi», - dedi Almas Sadýbaev.
Sonymen qatar departament basshysy qylmystyq atqarý júıesiniń bólimshelerinde jazanyń oryndalý jaı-kúıine, jumystardyń uıymdastyrylýyna birlesken tekserý júrgizip jatqanyn atap ótti.
