Talǵat Ermegııaevke qamqorlyq jasaǵan Astanadaǵy kolonııa basshysy sottaldy
ASTANA. QazAqparat - Sot Talǵat Ermegııaevtiń isi boıynsha úkim shyǵardy, dep habarlaıdy QazAqparat tilshisi.
Sottyń sheshimimen Astanadaǵy kolonııanyń burynǵy basshysy Nurlan Áben úsh jyl merzimge bas bostandyǵynan aıyryldy.
«Sot Áben Nurlan Saparulyn Qylmystyq kodekstiń 362-baby 4-bóligi 3-tarmaǵynda (Bılikti nemese laýazymdyq ókilettikterdi asyra paıdalaný) qarastyrylǵan qylmystyq quqyqbuzýshylyqqa jol bergeni úshin kináli dep tanyp, memlekettik qyzmette, sotta, jergilikti ózin-ózi basqarý organynda, QR Ulttyq bankinde jáne oǵan qarasty vedomstvolarda, memlekettiń jarǵylyq kapıtaly 5 paıyzdy quraıtyn memlekettik uıymdarda, sonymen birge ulttyq basqarý holdıngterinde, ulttyq kompanııalar men ulttyq damý ınstıtýttarynda, oǵan qarasty uıymdarda eńbek etý quqyǵynan aıyra otyryp, ony 3 jyl merzimge bas bostandyǵynan aıyrdy», - dedi Astana qalasynyń Baıqońyr aýdandyq №2 sotynyń sýdıasy Aıjan Kúlbaeva.
Burynǵy kolonııa basshysy jazasyn qaýipsizdigi mınımaldy jazasyn óteý mekemesinde óteıtin bolady. Sonymen birge, Áben polkovnık sheninen aıyryldy. Onyń jazasy 2017 jyldyń 20 jeltoqsanynan bastalyp esepteledi.
Kolonııa bastyǵynyń burynǵy orynbasary Talǵat Musaev ta jazadan qutylǵan joq. Ol eki jylǵa túrmege qamaldy.
Sondaı-aq, sot N.Áben men T.Musaevty saraptama óndirisine jumsalǵan 650 143 teńgelik (ekeýi de osy somadan) protsessýaldyq shyǵyndy óteýge mindettedi.
Eske sala ketsek, ótken jyly Ulttyq bıýro sottalýshy T.Ermegııaevtiń jazasyn jaıly jaǵdaıda ótkizýine múmkindik jasaǵan ETs-166/10 túzeý mekemesiniń bastyǵy, ádilet polkovnıgi N.Áben men onyń orynbasary, ádilet maıory T.Musaev sot santsııasymen ustalyp, tutqynǵa alynǵanyn jarııa etken bolatyn.
Foto: theopenasia.net
