Talǵat Ermegııaev QR Sport jáne dene shynyqtyrý isteri agenttiginiń tóraǵasy bolyp taǵaıyndaldy
ASTANA. 24 qańtar. QazAqparat /Marlan Jıembaı/ - QR Sport jáne dene shynyqtyrý isteri agenttiginiń tóraǵasy laýazymyna Talǵat Ermegııaev taǵaıyndaldy.
Bul týraly ol búgin Úkimet otyrysynan keıin BAQ ókilderiniń saýalyna bergen jaýabynda málim etti.
Agenttiktiń barlyq jumysy Elbasy alǵa qoıǵan sporttyq jetistikterge, nátıjelerge qol jetkizýge baǵyttalatynyn atap ótken ol, «búginnen bastap agenttik tóraǵasy qyzmetin atqaramyn»,-dedi.
T. Ermegııaevtyń atap ótýinshe, qazirgi ýaqytta vedomstvo London olımpıadasyna daıyndyqty jan-jaqty júrgizýde. Bul rette agenttik Beıjiń olımpıadasynan da joǵary nátıje kórsetýge nıetti. Sportshylardyń daıyndyǵy óte joǵary. Materıaldyq-tehnıkalyq baza nyǵaıtylǵan.
«Meniń oıymsha, medaldar sany, sporttyq nátıjeler boıynsha úzdik óner kórsetemiz. Máselen, Beıjińde jalpy komandalyq esepte 29 orynda bolsaq, Londonda 28 orynda bolamyz dep oılaımyn. Budan da jaqsy nátıjege úmittimiz», - dedi T. Ermegııaev.
