Talǵat Bıgeldınov qazaq halqynyń mártebesin arttyrǵan asyl tulǵa - T. Áýbákirov
Bul týraly búgin Almatyda Talǵat Bıgeldınov turǵan úıge eskertkish taqta ornatý rásimi barysynda Qazaqstannyń tuńǵysh ǵaryshkeri, Keńes Odaǵynyń Batyry, Qazaqstan Respýblıkasynyń Halyq qaharmany, dańqty ushqysh Toqtar Áýbákirov málimdedi.
«Talǵat aǵa, kóńili taza, jany jaısań jan bolatyn. Onyń ómiri, jasaǵan erlikteri biz úshin úlgi. Soǵystan keıingi urpaq - bizdi óziniń ónegeli ómirimen tárbıelegen, kókke kótergen, ushqysh etken, otandy súıýdi úıretken osy Talǵat aǵa bolatyn. Ol nebári 23 jasynda eki márte Keńes Odaǵynyń Batyry atanyp, qazaq halqyn, Qazaqstandy búkil álemge tanytqan, mártebesin arttyrǵan jasampaz tulǵa. Bul memorıaldy taqta endi oǵan kerek emes. Ol tirilerge kerek, Qazaqstannyń bolashaǵyn jasaýshy óskeleń urpaqqa kerek. Onyń kórip: «Men de Talǵat Bıgeldınovteı batyr bolǵym keledi, men de ushqysh bolyp, Otan qorǵaǵym keledi», - dep aldyna maqsat qoıatyn jastar shyǵyp jatsa, men buǵan erekshe qýanamyn. Biz osyndaı otandasymyz bolǵany úshin baqytty halyqpyz», - dedi T. Áýbákirov.
Aıta ketelik, saltanatty rásimge Almaty qalasynyń ákimi Baýyrjan Baıbek, Talǵat Bıgeldınovtiń jary Oryndybıke Jekenqyzy men qyzdary, Uly Otan soǵysynyń ardagerleri, memleket jáne qoǵam qaıratkerleri, QR Qarýly kúshteriniń ardagerleri jáne qala turǵyndary qatysty.
