Talǵat Baısýfınov: Basty maqsat – Ulttar lıgasynda jeńiske jetý

ASTANA. KAZINFORM – Búgin fýtboldan Qazaqstan ulttyq quramasy bas bapkeri qyzmetine taǵaıyndalǵan Talǵat Baısýfınov aldaǵy jospary jóninde aıtyp berdi. Bul jóninde Qazaqstan fýtbol federatsııasynyń áleýmettik jelidegi paraqshasynda jarııalandy. 

– Ulttyq qurama – halyqtyń komandasy. Sol fılosofııa, sol ıdeıany aldymen oıynshylarǵa jetkizý kerek. Ony fýtbolshylar jaqsy túsinedi. Endigi kezekte bapkerler quramy olarmen kezdesip, ortaq iske birlese jumylýǵa kúsh salamyz. Aldaǵy maqsatqa osylaısha jetýge kóńil bólemiz. Qazaqstan fýtbol federatsııasy tarapynan aldymyzǵa úlken maqsattar qoıyldy. Bıyl ótetin Ulttar lıgasynda jeńiske jetip, jankúıer senimin aqtaý – basty talap. Soǵan daıyndyq júrgizemiz. Túrkııada oıynshylarmen kezdesemiz. Onda qazaqstandyq komandalardyń bapkerlerimen jolyǵamyz. Ulttyq qurama aldymen naýryz aıynda jınalady. Daıyndyqtyń alǵashqy kezeńne jańa oıynshylardy shaqyrýymyz múmkin. Ekinshi oqý-jattyǵý jıyny maýsym aıyna belgilenip otyr. Ol ýaqytta joldastyq eki kezedsý ótkizemiz degen josparymyz bar. Bul oıyndar aldaǵy fýtbol maýsymyna basty daıyndyq retinde sanalady. Qyrkúıek aıynda Ulttar lıgasyn bastap ketemiz, - dedi Talǵat Baısýfınov.

Aıta ketsek, búgin Qazaqstan fýtbol federatsııasy Qazaqstan ulttyq quramasynyń bas bapkeri qyzmetine Talǵat Baısýfınovtiń taǵaıyndalǵanyn habarlady. 

Talǵat Marýauly 2025 jyldyń qazanynda ulttyq qurama tizginin úshinshi márte ustady. Onyń jetekshiligimen komanda 2026 jylǵy álem chempıonatynyń irikteý kezeńinde birneshe match ótkizdi. Atap aıtqanda, Qazaqstan ulttyq quramasy Lıhtenshteındi 4:0 esebimen jeńip, Soltústik Makedonııa (1:1) jáne Belgııa (1:1) quramalarymen teń tústi. 

Buǵan deıin T. Baısýfınov 2016-2017 jáne 2020-2022 jyldar aralyǵynda ulttyq quramanyń bas bapkeri qyzmetin eki ret atqardy.