Talǵarlyqtar qaladaǵy jalǵyz stadıondy jekemenshikke berýge qarsy

QONAEV. KAZINFORM — Talǵar turǵyndary qaladaǵy jalǵyz qoljetimdi «Jastar» stadıonyn jeke tulǵalarǵa berýge qarsy ekenderin bildirip beıneúndeý jasady.Beıneúndeýde talǵarlyqtar Almaty oblysynyń ákimine qalada ornalasqan «Jastar» stadıonyn jóndep berýdi talap etip jáne onyń jeke tulǵalarǵa ótip ketýine qarsy ekenderin jetkizdi. 

Buǵan deıin qalada eki jıyn ótip, talǵarlyqtar sport nysanynyń bir bóligine jabyq keshen salyp, ekinshi bóligin shaǵyn fýtbol alańyna aınaldyrýdy josparlap otyrǵan jeke ınvestorlarǵa berýge qarsylyq bildirgen bolatyn. Osylaısha, Talǵar jergilikti turǵyndarǵa úlken fýtbol oınaýǵa arnalǵan jalǵyz stadıonnan aıyrylýy múmkin.

— Endi jergilikti bılik bul máseleni turǵyndarmen talqylamaı, búgin, 5 mamyrda ákimdik ǵımaratynda qoǵamdyq keńes otyrys ótkizýdi uıǵarypty. Bul múlikke áldekimniń kózi túsken sııaqty, — delingen jazbada.

Osy jaǵdaıǵa baılanysty Kazinform redaktsııasy Almaty oblysynyń ákimdigine saýalhat joldady, izirge jaýap almadyq.

Osyǵan deıin mánerlep syrǵanaýdan álem birinshiliginiń kúmis júldegeri, Almaty týmasy Mıhaıl Shaıdorov birneshe suhbatynda elimizdiń ońtústik astanasynda jarystarǵa daıyndyq úshin tıisti jaǵdaı joq ekenin aıtqan bolatyn.