Talǵardaǵy ortalyq bazar órtendi

TALDYQORǴAN. QazAqparat - Almaty oblysynyń Talǵar qalasynda bazar órtenip, úsh saǵattyń ishinde tolyqtaı sóndirildi. Jalyn 900 sharshy metr jerdi sharpyǵan, - dep habarlaıdy QazAqparat tilshisi.

«Áıteke bı kóshesi boıynda ornalasqan ámbebap bazar aýmaǵynda saýda núkteleri (konteıner túrindegi) janyp jatqany týraly habarlama 7 sáýir kúni túngi saǵat 2:00-de kelip tústi. Dereý órt sóndirý bólimsheleri jiberildi. Jalyn saǵat 03:51-de aýyzdyqtalyp, saǵat 05:00-de tolyq sóndirildi. 900 sharshy metr jerdi sharpyǵan. Qaza tapqandar joq» delingen Almaty oblystyq TJD baspasóz qyzmetiniń habarlamasynda.

Vedomstvonyń habarlaýynsha, órtke qarsy qyzmettiń jedel is-qımyldary nátıjesinde jalynnyń bazardyń barlyq aýmaǵyna taralýyna jol berilgen joq. Al ámbebap bazardyń jalpy aýdany - 8330 sh.m.

Órt sóndirýge oblystyq TJD-nyń 25 qyzmetkeri men 8 tehnıkasy, Almaty qalasy TJD-nyń 6 qyzmetkeri men 2 tehnıkasy, sondaı-aq polıtsııa ókilderi, jedel járdem brıgadalary jáne basqa da ózara is-qımyl qyzmetteri qatysty.

«Órttiń shyǵý sebebi anyqtalyp jatyr. Oqıǵa ornyna Almaty oblysy TJD Órt synaq zerthanasy jiberildi» dep kórsetilgen baspasóz qyzmetiniń habarlamasynda.