Talǵardaǵy tragedııa: órt qylmysy boıynsha aıǵaqtar alyndy, saraptamalar júrgizilip jatyr
ALMATY. KAZINFORM — Іshki ister mınıstriniń birinshi orynbasary Baýyrjan Alenov pen Almaty oblysynyń prokýrory Berik Adamov Talǵar aýdanyndaǵy úıdi órteý faktisi boıynsha tergeý barysy týraly habarlady. Bul týraly QR ІІM baspasóz qyzmeti málim etti.
Baýyrjan Alenovtyń aıtýynsha, qylmys jasalǵan sátten bastap, ıaǵnı 4 qazannan beri Talǵar aýdanynda mınıstrdiń birinshi orynbasary bastaǵan ІІM ortalyq apparaty qyzmetkerlerinen quralǵan jedel-tergeý toby jumys istep jatyr.
– Jedel-tergeý toby qurylyp, qylmys jasalǵan jerde muqııat tekserý jumystaryn júrgizýde. Beınebaqylaý kameralarynan jazbalar qaralýda. Aýlalar men esepte turǵan tulǵalar tekserilýde. Otbasynyń turǵylyqty jerin polıtsııa qyzmetkerleri patrýldeýde. Oqıǵa oryn alǵan kezde órt bolǵan úıde eshkim turyp jatqan joq edi. Januıa qazirgi kezde basqa mekenjaıda turyp jatyr. Qylmyskerler ustalyp, mindetti túrde jaýapqa tartylady. Sonymen qatar jalǵan aqparat taratpaýǵa shaqyramyn, – dedi Іshki ister mınıstriniń birinshi orynbasary Baýyrjan Alenov.
Almaty oblysynyń prokýrory Berik Adamov barlyq tergeý áreketteri Bas prokýratýranyń baqylaýynda ekenin atap ótti.
– Tergeý barysy týraly bas prokýrorǵa esep beremin. Búgingi tańda arnaıy prokýrorlar úıdi órteý faktisin tergep jatyr. Oqıǵa ornynan barlyq aıǵaqtar alynyp, olar boıynsha tıisti saraptamalar taǵaıyndaldy. Biz saraptama nátıjelerin kútýdemiz, odan keıin qosymsha aqparat beriledi. Búgingi tańda osy is boıynsha kóptegen jalǵan aqparat taratylýda. Azamattarǵa jalǵan aqparat taratqany úshin qylmystyq jaýapkershilik qarastyrylatynyn eskertkim keledi, – dedi Almaty oblysynyń prokýrory Berik Adamov.
Eske salaıyq, saǵat 00:50–de úıdi jalyn sharpyǵan. Órt saǵat 01:43–de tolyǵymen joıyldy.
Buǵan deıin 4 qazan kúni Talǵar qalasyndaǵy tóbelesten jasóspirim qaıtys bolǵanyn jazǵanbyz.
Odan keıin Sherzattyń týǵan-týystary men Talǵar turǵyndary ashyq tergeý bolýyn talap etip, narazylyqqa shyqqan bolatyn.
Búgin Bas prokýratýranyń basshylyǵymen qylmysty ashý úshin vedomstvoaralyq jedel-tergeý toby qurylǵany belgili boldy.
Búgin Іshki ister mınıstriniń birinshi orynbasary Baýrjan Alenov marqum Sherzat Bolattyń úıin órteý oqıǵasyn tergeý tobymen Talǵarǵa bardy.
