Talǵardaǵy stadıondy satý nemese jekemenshikke berý qarastyrylyp jatqan joq – ákimdik

QONAEV. KAZINFORM – Talǵar qalasyndaǵy «Jastar» stadıonyn qaıta jańǵyrtý ınvestıtsııa tartý arqyly júzege asyrylmaq. Alaıda nysandy satý nemese jekemenshikke berý máselesi qarastyrylyp jatqan joq. Bul týraly Almaty oblysy ákimdiginen málim etti. 

– Stadıonnyń qazirgi apatty jaǵdaıyn eskere otyryp, jergilikti atqarýshy organdar ony 39 jyl merzimge senimgerlik basqarýǵa berý týraly usynys jasady. Bul – satyp alý quqyǵynsyz ýaqytsha shara jáne qoldanystaǵy zańnamaǵa tolyq sáıkes keledi. Mundaı sheshim bıýdjetke túsetin júktemeni azaıtyp, sporttyq jáne mádenı ınfraqurylymdy damytý úshin jeke ınvestıtsııa tartýǵa jol ashady, – dep habarlady Almaty oblysy ákimdiginen.

Ákimdikten atap ótkendeı, stadıon satylady nemese jekemenshikke beriledi degen aqparat – jalǵan. Bul shyndyqqa sáıkes kelmeıdi jáne eshqandaı zańdy negizi joq.

– Atalǵan másele boıynsha 2025 jylǵy 15 naýryz, 5 sáýir jáne 5 mamyr kúnderi Qarasaı batyr kóshesindegi №6 orta mektepte qoǵamdyq tyńdaýlar ótti. Oǵan qala turǵyndary, memlekettik organdar, ınvestorlar men qoǵam belsendileri qatysty. Másele áli de talqylanyp jatyr. Barlyq usynys-pikir eskeriletin bolady. Qabyldanatyn sheshimder ashyq ári jarııa túrde júzege asyrylady, – dep túsindirdi ákimdikten.

Osyǵan deıin Talǵar turǵyndary qaladaǵy jalǵyz qoljetimdi «Jastar» stadıonyn jeke tulǵalarǵa berýge qarsy ekenderin bildirip beıneúndeý jasaǵan edi. 

Eske salaıyq, buǵan deıin mánerlep syrǵanaýdan álem birinshiliginiń kúmis júldegeri, Almaty týmasy Mıhaıl Shaıdorov birneshe suhbatynda elimizdiń ońtústik astanasynda jarystarǵa daıyndyq úshin tıisti jaǵdaı joq ekenin aıtqan bolatyn.