Talǵardaǵy oqıǵa: Sherzat Polattyń ólimine qatysty qylmystyq is bes bap boıynsha tirkeldi
ASTANA. KAZINFORM – Almaty oblysy Talǵar qalasyndaǵy Sherzat Polattyń ólimine qatysty qylmystyq is aıasynda qasaqana kisi óltirýge qatysty kúdikpen 8 adam jáne qylmys týraly habarlamaý boıynsha 3 adam sottyń sanktsııasymen qamaýǵa alynǵan. Bul týraly Іshki ister mınıstri Erjan Sádenovtiń Májilis depýtattaryna bergen resmı jaýabynda aıtylǵan.
Mınıstrdiń jaýabynda keltirilgen derekke sensek, Sherzat Polattyń ólimine qatysty Almaty oblysy polıtsııa departamenti Qylmystyq kodekstiń 99-babynyń 2-bóligi (adam óltirý), 293-babynyń 3-bóligi (buzaqylyq), 115-baby (qorqytý), 432-baby (qylmysty jasyryp qalý) jáne 434-babymen (qylmys týraly habarlamaý) qylmystyq isterdi tirkep, tergeýge alǵan.
«Tergeý barysy meniń jeke baqylaýymda, oqıǵa ornynda mınıstrliktiń ortalyq apparatynyń qyzmetkerleri de jumys istep jatyr. Alǵashqyda oqıǵanyń sebebine qatysty áleýmettik jelilerde shyndyqqa janaspaıtyn ár túrli málimettiń kóp taralýyna baılanysty mınıstrlik (Qylmystyq-protsestik kodekstiń 201-babynyń talaptaryna saı) 15 qazanda buqaralyq aqparat quraldary ókilderiniń qatysýymen brıfıng ótkizip, keı tergeý málimetterin jarııa etti. Brıfıng qoǵamdy alańdatqan keıbir máselelerdi qamtydy», — dep jazylǵan Erjan Sádenovtiń jaýabynda.
Vedomstvo basshysynyń sózinshe, qazir tergeý jalǵasyp jatyr, onyń barysynda oqıǵa bolǵan jerde bolǵan basqa da adamdardyń qatysy bar-joǵy tekserilip, áreketine quqyqtyq baǵa beriledi.
Eske salaıyq, 4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz.
Ashýly talǵarlyqtar jasóspirim ólimine baılanysty narazylyqqa shyqty.
Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.
Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.
Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi.
Almaty oblystyq polıtsııa departamenti bastyǵynyń mindetin atqarýshy Serik Shalqarov beınebaqylaý kameralarynan alynǵan jazbalar zerttelip jatqanyn jetkizdi.
12 qazan túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
Sondaı-aq Bas prokýratýra qylmysty ashý úshin vedomstvoaralyq jedel-tergeý toby qurylǵanyn málimdedi.
Keıin Іshki ister mınıstriniń birinshi orynbasary Baýyrjan Alenov órt qylmysy boıynsha aıǵaqtar alynyp, tıisti saraptamalar júrgizilip jatqanyn habarlady.
Qoǵamdyq tártipti qadaǵalaý úshin Ulttyq ulan áskeri jumyldyryldy.
15 qazan kúni Talǵar qalasynyń ákimi Bahyt Qýatbekuly Kúrishbekov, Talǵar qalasy ákiminiń orynbasary Matan Saǵyndyq óz mindetterin tıisti deńgeıde atqarmaǵany úshin laýazymdarynan bosatyldy.
Artynsha, Talǵar aýdany ákimi apparatynyń basshysy Aslan Qasymbaev qyzmetinen qýyldy. Al, Talǵar aýdanynyń ákimi Tanat Esenkeldiuly Aıdarbekov jáne onyń orynbasary Aıbek Dúısembekuly Bıdaev sógis aldy.
Іshki ister mınıstrliginiń ókilderi BAQ qyzmetkerlerine Sherzat Bolat qaza tapqan jerde kameraǵa túsip qalǵan vıdeony kórsetti.
Prokýratýra sottyń ashyq ótýin suraıtyndaryn jetkizdi.
Artynsha marqum Sherzat Bolattyń isi boıynsha Almaty oblysynyń birneshe joǵary laýazymdy polıtsııa qyzmetkeri qyzmetinen bosatyldy.
Parlament Májilisi Zańnama jáne sot-quqyqtyq reforma komıtetiniń múshesi Qaırat Balabıevten Talǵar oqıǵasyna qatysty istiń ýshyǵýyna Baýyrjan Álenov te jaýapty ekenin aıtqan bolatyn.
