Talǵardaǵy oqıǵa: polıtsııa qyzmetkerleriniń áreketsizdigine baılanysty is qozǵaldy

ALMATY. KAZINFORM – 2025 jylǵy 6 qyrkúıekte Almaty oblysynyń prokýratýrasy Talǵar aýdandyq polıtsııa basqarmasy qyzmetkerlerine qatysty Qylmystyq kodekstiń 370-babynyń 4-bóligi («Laýazymdy tulǵalardyń áreketsizdigi») boıynsha qylmystyq is qozǵady.

Vedomstvonyń málimetinshe, olarǵa kámeletke tolmaǵan qyzdy urlap áketip, er adamdy óltirgen kúdiktini ýaqtyly ustaý úshin sharalardy qabyldamaǵan degen aıyp taǵylyp otyr. Qaıǵyly oqıǵa Talǵar aýdany Qyzylqaırat aýylynda bolǵan.

Bul isti arnaıy prokýrorlar óndirisine aldy. Qazir tergeýdiń barysy oblys prokýratýrasynyń erekshe baqylaýyna alyndy.

Prokýratýra jalǵan aqparat taratqandar qylmystyq jaýapkershilikke tartylatynyn eskertti. Sondaı-aq resmı derek kózderge ǵana senýge shaqyrady. Basqa málimetter QPK-niń 201-babyna sáıkes jarııa etilmeıdi.

Eske salaıyq, buǵan deıin Talǵarda er adamdy atyp, eki jastaǵy qyzdy urlap, qashyp ketkenin habarlaǵan edik.

Keıin polıtsııanyń arnaıy jasaǵy qyzdy bosatyp aldy. Bala anasymen qaýyshty, al kúdikti ustaldy. 

Tergeý málimetinshe, kúdikti men qyzdyń anasy buryn jaqyn qarym-qatynasta bolǵan. Aralarynda janjal shyǵyp, er adam áıeldiń – aǵasyn myltyqpen atyp tastaǵan. Ol alǵan jaraqatynan sol jerde kóz jumǵan. Odan keıin kúdikti kishkentaı qyzdy alyp qashqan. 

Kisi ólimi jáne bala urlaý deregi boıynsha qylmystyq ister qozǵaldy.

Keıinirek advokat Gaýhar Sárıeva Talǵarda urlanǵan qyzǵa ota jasalǵanyn aıtty.