Talǵardaǵy kisi ólimi: prokýratýra sottyń ashyq ótýin suraıtyn bolady
QONAEV. KAZINFORM – Almaty oblysynyń prokýrory Berik Adamov Sherzat Bolatqa qatysty sot protsesin onlaın ótkizý týraly ótinish beredi.
«Jábirlenýshiler tarapynan sottyń ashyq ótýi týraly kóp aıtylyp jatyr. Tergeý satysynda zańbuzýshylyqtarǵa jol berilmedi. Prokýratýra ashyq sot protsesin onlaın rejımde ótkizý týraly ótinish jasaıdy», - dedi prokýror baspasóz máslıhatynda.
Buǵan deıin Іshki ister mınıstrliginiń ókilderi Talǵardaǵy 16 jastaǵy Sherzat Bolat qaza tapqan jerde kameraǵa túsip qalǵan vıdeony kórsetti.
Al Almaty oblysynyń prokýrory Berik Adamov qylmystyq is boıynsha júrgizilip jatqan tergeý satysynda eshqandaı zańbuzýshylyq anyqtalmaǵanyn aıtty.
Sondaı-aq, órtengen Sherzattyń ata-anasy turǵan úıdiń syrtynan rezeńke qolǵap pen kanıstr tabylǵany týraly aıtyldy.
Іshki ister mınıstriniń birinshi orynbasary Baýyrjan Álenov Sherzat Bolattyń ólimine jáne buzaqylyqqa qatysty 10 kúdikti ustalǵanyn málimdedi.
Eske salaıyq, 4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz.
Ashýly talǵarlyqtar jasóspirim ólimine baılanysty narazylyqqa shyqty.
Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.
Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.
Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi.
Almaty oblystyq polıtsııa departamenti bastyǵynyń mindetin atqarýshy Serik Shalqarov beınebaqylaý kameralarynan alynǵan jazbalar zerttelip jatqanyn jetkizdi.
12 qazan kúni túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
Sondaı-aq, Bas prokýratýra qylmysty ashý úshin vedomstvoaralyq jedel-tergeý toby qurylǵanyn málimdedi.
Іshki ister mınıstriniń birinshi orynbasary Baýyrjan Alenov marqum Sherzat Bolattyń úıin órteý oqıǵasyn tergeý tobymen Talǵarǵa bardy.
Keıin Іshki ister mınıstriniń birinshi orynbasary Baýyrjan Alenov órt qylmysy boıynsha aıǵaqtar alynyp, tıisti saraptamalar júrgizilip jatqanyn habarlady.
Qoǵamdyq tártipti qadaǵalaý úshin Ulttyq ulan áskeri jumyldyryldy.
