Talǵardaǵy kottedj qalashyǵynda taý betkeıinen topyraq syrǵyp tústi
QONAEV. KAZINFORM – 2026 jylǵy 8 aqpanda saǵat 10:23 shamasynda Talǵar aýdanyna qarasty Besaǵash aýylyndaǵy «Býrabaı» kottedj qalashyǵynda taý betkeıinen jer massasynyń jyljýy tirkeldi. Oqıǵaǵa keıingi kúnderdegi turaqsyz aýa raıy men topyraqtyń shamadan tys ylǵaldanýy sebep bolǵan.
Almaty oblysy ákimdiginiń málimetinshe, jyljyǵan topyraq Baıanaýyl kóshesindegi №8 jáne №24a jeke turǵyn úılerdiń aýmaǵyna túsken. Jer massasy betonnan salynǵan tireý qabyrǵadan asyp ótken.
– Aldyn ala málimetke sáıkes, Baıanaýyl kóshesi №8 mekenjaıynda kólemi 15×5 metr bolatyn bastyrma zaqymdanyp, HAVAL JOLION markaly jeńil avtokólikke jáne bólek turǵan sharýashylyq qurylysynyń qabyrǵalaryna zııan kelgen. Bul aýmaqta jyljyǵan topyraq kólemi shamamen 465 tekshe metr boldy. Al №24a úıdiń aýmaǵyna shamamen 5 tekshe metr topyraq túsken, aıtarlyqtaı zaqymdaný tirkelmegen, - delingen habarlamada.
Zardap shekkender joq. Ákimdiktiń málimetinshe, №8 úıde úsh adam, al Baıanaýyl kóshesindegi №12 úıde bes adam turady.
Bul aýmaqtaǵy turǵyn úıler buryn taý betkeıin óz betinshe kesý arqyly salynǵan. Qazirgi ýaqytta betkeıdiń joǵarǵy bóligindegi kóshelerge káriz jelilerin tartý jobasy ázirlengen. Ákimdik aldaǵy bıýdjettik komıssııa otyrysynda qurylys-montaj jumystaryn qarjylandyrý jáne betkeıdi nyǵaıtý úshin sala mamandaryn tartý máselesi qaralatynyn málimdedi.
Qazir aýmaqty topyraqtan tazalaý jáne qalpyna keltirý jumystary júrgizilip jatyr.
Eske salaıyq, buǵan deıin Qazaqstanda kóktemgi sý tasqynyna daıyndyq aıasynda ózen arnalarynyń shamamen 110 shaqyrym bóligi tazartylyp jatqanyn habarlaǵanbyz.