Talǵardaǵy qylmys deńgeıi 18% azaıǵan — Marat Sultanǵazıev

QONAEV. KAZINFORM — Almaty oblysy ákimi Marat Sultanǵazıev Talǵar qalasyndaǵy atyshýly qylmystyq oqıǵalar týraly tilshiler suraǵyna jaýap berdi. 

— Muny statıstıkaǵa súıenip aıtý kerek, Polıtsııa departamenti men Bas prokýratýranyń arnaıy esepter komıtetiniń derekterine júginý qajet. Sol derekterge qarasaq, Talǵardaǵy qylmys deńgeıi 18%-ǵa tómendegen, oblys boıynsha da qylmys deńgeıi tómendep keledi. Bul quqyq qorǵaý organdary men jergilikti atqarýshy organdardyń jumys tıimdiligin kórsetedi, — dep jaýap berdi Marat Sultanǵazıev Ortalyq kommýnıkatsııalar qyzmetinde.

Ákimniń aıtýynsha, oblys ishinde shaǵym, talap jáne basqa da máseleler boıynsha Talǵar birinshi orynda emes, Eńbekshiqazaq, Qarasaı aýdandarynan keıin úshinshi orynda tur.

Keıbir rezonansty jaǵdaılardan keıin jaǵymsyz pikir qalyptasqan.

— Jalpy Talǵar — óte jaqsy ári qarqyndy damyp kele jatqan óńir. Búgin men eki úlken fýtbol klýby ashylǵanyn aıttym. Sońǵy birneshe jylda munda ındýstrııalyq aımaqtar ashylyp, donor aımaqqa aınaldy. Onyń ústine, Almatyǵa jaqyn, halqy tyǵyz ornalasqan óńir bolǵandyqtan, bul faktor Talǵar týraly osyndaı pikirdiń qalyptasýyna yqpal etken bolýy múmkin. Qazir qalada PD-men kelisim boıynsha beınebaqylaý kameralary belsendi túrde ornatylyp jatyr, — dedi oblys ákimi.

2025 jylǵy 6 qyrkúıekte Talǵarda jantúrshigerlik qylmys boldy: beıtanys adam er kisini atyp, kishkentaı qyzdy alyp qashyp ketken edi. Jaqynda bul qylmystyq is sotqa joldandy.

Byltyr 4 qazan kúni Talǵardaǵy tóbelesten 16 jastaǵy Sherzat Polat qaza tapty. Sherzat ólimine qatysty 9 adam 23 jyldan 1,5 jylǵa deıin sottaldy.

Buǵan deıin Marat Sultanǵazıev oblys aýmaǵyndaǵy alǵashqy AES mańyndaǵy jergilikti halyqqa ekologııalyq ótemaqy tóleý týraly suraqtarǵa jaýap berdi.