Talǵardaǵy qandy oqıǵanyń aldyn almaǵan polıtseılerdiń isi sotta qaralyp jatyr

2025 jylǵy 6 qyrkúıekte Almaty oblysynyń prokýratýrasy Talǵar aýdandyq polıtsııa basqarmasy qyzmetkerlerine qatysty Qylmystyq kodekstiń 370-babynyń 4-bóligi («Laýazymdy tulǵalardyń áreketsizdigi») boıynsha qylmystyq is qozǵady. Olarǵa kámeletke tolmaǵan qyzdy urlap áketip, er adamdy óltirgen kúdiktini ýaqtyly ustamady degen aıyp taǵyldy. 

Kazinform agenttiginiń saýalyna jaýap bergen Almaty oblystyq soty eki qylmystyq is boıynsha sot talqylaýy júrip jatqanyn habarlady. Burynǵy polıtsııa qyzmetkerlerine taǵylǵan aıyp pen qylmystyq is baptary ózgergen.

- Almaty oblysy Talǵar aýdandyq sotynda eki qylmystyq is qabyldandy. E.esimdi azamatqa qatysty is QR Qylmystyq kodeksiniń 371-baby 2-bóligi (salǵyrttyq) jáne 369-baby 2-1-bóligi (qyzmettik jalǵandyq jasaý) boıynsha qaralyp jatyr, — delingen sot jaýabynda.

Sot kabınetiniń málimetine sáıkes, is sotqa ótken jyldyń sońynda túsken. Ony Talǵar aýdandyq sotynyń sýdıasy Tólebek Sraıylov qarap jatyr. Sottalýshydan «eshqaıda ketpeý týraly» qolhat alynyp, bultartpaý sharasy taǵaıyndalǵan.

- Ekinshi qylmystyq is D esimdi azamatqa qatysty QR Qylmystyq kodeksiniń 433-baby 3-bóligi (qylmystyq quqyq buzýshylyqty qasaqana jasyryp qalý) boıynsha qozǵalǵan. Eki qylmystyq is te ashyq sot otyrysynda qaralyp jatyr, — dep málimdedi Almaty oblystyq soty.

Eske salaıyq, Talǵarda 2025 jylǵy 6 qyrkúıekte jantúrshigerlik qylmys boldy: beıtanys adam er kisini atyp, kishkentaı qyzdy alyp qashyp ketken edi. Tergeý málimetinshe, kúdikti men kishkentaı qyzdyń anasy buryn jaqyn qarym-qatynasta bolǵan. Aralarynda janjal shyǵyp, er adam áıeldiń aǵasyn myltyqpen atyp tastaǵan. Ol alǵan jaraqatynan sol jerde kóz jumǵan.

Keıin polıtsııanyń arnaıy jasaǵy qyzdy bosatyp, kúdiktini ustady. Artynsha jaraqat alǵan kishkentaı qyzǵa ota jasaldy. 

2025 jyldyń 17 qarashasynda is sotqa joldandy. Al 4 jeltoqsanda Qaskeleń qalasynda aldyn ala sot otyrysy ótip, tóraǵalyq etýshi sýdıa sheshimimen sot jabyq rejımde ótetinin boldy.