Talǵardaǵy qandy oqıǵa: polıtsııa qyzmetkerine qatysty tergeý aıaqtaldy
QONAEV. KAZINFORM – Almaty oblysynda Talǵar aýdany polıtsııa basqarmasynyń bir qyzmetkeriniń salǵyrttyǵyna qatysty qylmystyq isti tergeý aıaqtaldy.
Bul týraly jábirlenýshi taraptyń advokattary málimdedi.
2025 jylǵy 6 qyrkúıekte Almaty oblysynyń prokýratýrasy Talǵar aýdany polıtsııa basqarmasynyń laýazymdy tulǵalarynyń salǵyrttyǵyna qatysty qylmystyq is qozǵaǵan. Olar Qyzylqaırat aýylynda er adamdy óltirip, kámeletke tolmaǵan qyzdy urlap ketken kúdiktini ustaýǵa qatysty qajetti sharalardy qolǵa almaǵan.
– Almaty oblysy prokýratýrasynyń arnaıy prokýrorlary aldyn ala tergeý basqarmasy qyzmetkerleriniń ústinen qylmystyq is qozǵady, olardyń birine qatysty tergeý búgin aıaqtaldy. Bul – «E» esimdi ýchaskelik polıtseı. Biz osy is boıynsha jábirlenýshilerdiń múddesin qorǵap otyrmyz. Ádil sheshimge jetýge tyrysamyz, - dedi advokat Asylbek Ábdiraıymov.
Tergeý Qazaqstan Respýblıkasy Qylmystyq kodeksiniń 371-baby (salǵyrttyq) jáne 369-baby (qyzmettik jalǵandyq jasaý) boıynsha júrgizildi.
– Qazir jábirlenýshi tarap qylmystyq is materıaldarymen tanysyp jatyr. Polıtsııanyń qalǵan qyzmetkerlerine qatysty tergeý jalǵasyp jatyr, - dedi advokat Jandos Palmanov.
Eske salaıyq, Talǵarda 2025 jylǵy 6 qyrkúıekte jantúrshigerlik qylmys boldy: beıtanys adam er kisini atyp, kishkentaı qyzdy alyp qashyp ketken edi.
Tergeý málimetinshe, kúdikti men kishkentaı qyzdyń anasy buryn jaqyn qarym-qatynasta bolǵan. Aralarynda janjal shyǵyp, er adam áıeldiń aǵasyn myltyqpen atyp tastaǵan. Ol alǵan jaraqatynan sol jerde kóz jumǵan.
Keıin polıtsııanyń arnaıy jasaǵy qyzdy bosatyp, kúdiktini ustady.
Artynsha jaraqat alǵan kishkentaı qyzǵa ota jasaldy.
Bul oqıǵa boıynsha polıtsııa qyzmetkerleriniń áreketsizdigine baılanysty is qozǵaldy.
Keıinirek polıtsııa basqarmasynyń laýazymdy tulǵalaryna qatysty tergeý áli de júrip jatqany habarlandy.
Al 2025 jylǵy 13 qazanda kisi óltirý men bala urlaý isi boıynsha tergeý aıaqtalǵany belgili boldy.