Talǵardaǵy qandy oqıǵa: polıtsııa qyzmetkeri salǵyrttyǵy úshin sottaldy
QONAEV. KAZINFORM – Almaty oblysynyń Talǵar aýdandyq sotynda kisi óltirý jáne qyz balany urlaý isi boıynsha oqıǵanyń aldyn almaǵan polıtsııa qyzmetkerine úkim shyqty.
Byltyr 6 qyrkúıekte Almaty oblysynyń prokýratýrasy Talǵar aýdandyq polıtsııa basqarmasynyń laýazymdy tulǵalarynyń áreketsizdigi boıynsha qylmystyq is qozǵaǵan bolatyn. Olarǵa kámeletke tolmaǵan qyzdy urlap áketip, er adamdy óltirgen kúdiktini ýaqtyly ustamady degen aıyp taǵyldy.
Ýchaskelik polıtsııa ınspektory E.-ge qatysty is QR Qylmystyq kodeksiniń 371-baby 2-bóligi (salǵyrttyq) jáne 369-baby 2-1-bóligi (qyzmettik jalǵandyq jasaý) boıynsha qaraldy. Jábirlenýshi taraptyń advokattary Asylbek Ábdiraıymov pen Jandos Palmanovtyń aıtýynsha, sot jazalardy ishinara qosý arqyly E.-ge 2 jyl 4 aı merzimge bas bostandyǵynan aıyrý jazasyn taǵaıyndady.
— QR QK-niń 369-baby boıynsha sot 2 jyl 2 aıǵa, al 371-baby boıynsha 2 jyl 4 aıǵa bas bostandyǵynan aıyrý jazasyn kesti. Túpkilikti jaza retinde 2 jyl 4 aı merzim belgilendi. Ýchaskelik ınspektor E. sot zalynda birden qamaýǵa alyndy. Ol jazasyn qaýipsizdigi ortasha kolonııada óteıdi, — dedi jábirlenýshi taraptyń advokattary.
Sonymen qatar polıtseı memlekettik qyzmettegi laýazymdardy atqarý quqyǵynan ómir boıyna aıyrylyp, «leıtenant» arnaıy sheninen de aıyryldy. Sot jábirlenýshi taraptyń moraldyq zııandy óteý úshin 3 mıllıon teńge óndirip alý týraly azamattyq talap aryzyn qanaǵattandyrdy.
Eske salaıyq, Talǵarda 2025 jylǵy 6 qyrkúıekte jantúrshigerlik qylmys boldy: beıtanys adam er kisini atyp, kishkentaı qyzdy alyp qashyp ketken edi. Tergeý málimetinshe, kúdikti men kishkentaı qyzdyń anasy buryn jaqyn qarym-qatynasta bolǵan. Aralarynda janjal shyǵyp, er adam áıeldiń aǵasyn myltyqpen atyp tastaǵan. Ol alǵan jaraqatynan sol jerde kóz jumǵan.
Keıin polıtsııanyń arnaıy jasaǵy qyzdy bosatyp, kúdiktini ustady. Artynsha jaraqat alǵan kishkentaı qyzǵa ota jasaldy.
2025 jyldyń 17 qarashasynda is sotqa joldandy. Al 4 jeltoqsanda Qaskeleń qalasynda aldyn ala sot otyrysy ótip, tóraǵalyq etýshi sýdıa sheshimimen sot jabyq rejımde ótetinin boldy.
Bıyl 18 naýryz kúni Talǵarda kishkentaı qyzdy urlap, kisi óltirgen adam 25 jylǵa sottaldy.