Talǵardaǵy qandy oqıǵa: polıtseılerdiń áreketsizdigine qatysty isi qandaı satyda
QONAEV. KAZINFORM — Talǵar aýdany polıtsııa basqarmasynyń laýazymdy tulǵalaryna qatysty tergeý áli de júrip jatyr.
Almaty oblysynyń prokýratýrasy Talǵar aýdandyq polıtsııa basqarmasy qyzmetkerlerine qatysty Qylmystyq kodekstiń 370-babynyń 4-bóligi («Laýazymdy tulǵalardyń áreketsizdigi») boıynsha qylmystyq is qozǵady.
Olarǵa kámeletke tolmaǵan qyzdy urlap áketip, er adamdy óltirgen kúdiktini ýaqtyly ustaý úshin sharalardy qabyldamaǵan degen aıyp taǵylyp otyr. Qaıǵyly oqıǵa Talǵar aýdany Qyzylqaırat aýylynda bolǵan edi.
Kazinform agenttigi tergeýdiń qandaı satyda ekenin bilý úshin resmı saýal joldady. Oblys prokýrorynyń orynbasary Nurjan Serikulynyń jaýabyna sáıkes, tergeýdi qazirgi ýaqytta Almaty oblysy prokýratýrasynyń sotqa deıingi tergeý basqarmasynyń vedomstvoaralyq jedel-tergeý toby júrgizip jatyr.
— Qazirgi tańda is boıynsha qajetti tergeý amaldary men saraptamalyq zertteýlerdiń kesheni júrgizilip jatyr. Іstiń barlyq mán-jaılary jan-jaqty, tolyq ári obektıvti túrde anyqtalýy qamtamasyz etilip jatyr, — dedi ol.
Qylmystyq kodekstiń atalǵan baby boıynsha 7 jylǵa deıin bostandyǵyn shekteý nemese bas bostandyǵynan aıyrý túrindegi jaza, sondaı-aq múlikti tárkileý jáne ómir boıyna belgili bir laýazymdardy atqarý ne belgili bir qyzmetpen aınalysý quqyǵynan aıyrý jazasy kózdelgen.
Sonymen qatar prokýratýra Qazaqstan Respýblıkasy Konstıtýtsııasynyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-babynyń 1-bóligine sáıkes, ár adam sot úkimi zańdy kúshine engenge deıin kinásiz bolyp esepteletinin eske saldy.
Eske salaıyq, Talǵarda 2025 jylǵy 6 qyrkúıekte jantúrshigerlik qylmys boldy: beıtanys adam er kisini atyp, kishkentaı qyzdy alyp qashyp ketken edi.
Tergeý málimetinshe, kúdikti men kishkentaı qyzdyń anasy buryn jaqyn qarym-qatynasta bolǵan. Aralarynda janjal shyǵyp, er adam áıeldiń aǵasyn myltyqpen atyp tastaǵan. Ol alǵan jaraqatynan sol jerde kóz jumǵan.
Keıin polıtsııanyń arnaıy jasaǵy qyzdy bosatyp, kúdiktini ustady.
Al Talǵardaǵy oqıǵa kezinde jaraqat alǵan kishkentaı qyzǵa ota jasaldy.
Ótken aptada Qyzylqaırat aýylynda bolǵan er adamdy óltirý jáne kámeletke tolmaǵan qyzdy urlaý isi boıynsha sotqa deıingi tergeý aıaqtaldy.