Talǵardaǵy qandy oqıǵa: kisi óltirý men bala urlaý isi boıynsha tergeý aıaqtaldy

QONAEV. KAZINFORM — Almaty oblysy Talǵar aýdanyndaǵy Qyzylqaırat aýylynda bolǵan er adamdy óltirý jáne kámeletke tolmaǵan qyzdy urlaý isi boıynsha sotqa deıingi tergeý aıaqtaldy.

Bul týraly agenttik tilshisine jábirlenýshi taraptyń advokaty Jandos Palmanov málimdedi. Onyń aıtýynsha, olar Almaty oblystyq polıtsııa departamentinen tergeýdiń aıaqtalǵany jóninde resmı habarlama alǵan. Qazir advokat áriptesi Asylbek Ábdiraıymovpen birge is materıaldarymen tanysyp jatyr.

Іstiń negizgi kúdiktisine Qylmystyq kodekstiń 11 baby boıynsha aıyp taǵylǵan. Atap aıtqanda:

• 99-bap, 2-bólik, 7-tarmaq – adamdar toby bolyp kisi óltirý;

• 125-bap, 3-bólik, 2-1-tarmaq – kámeletke tolmaǵandy qatystyrý arqyly adam urlaý;

• 120-bap, 1-bólik – zorlaý;

• 121-bap, 1-bólik – seksýaldyq sıpattaǵy kúsh qoldaný áreketteri;

• 190-bap, 3-bólik, 4-tarmaq – adamdar toby bolyp alaıaqtyq jasaý;

• 147-bap, 5-bólik – zańsyz bas bostandyǵynan aıyrý;

• 149-bap, 2-bólik – turǵyn úıge zańsyz kirý;

• 115-bap – adam óltiremin dep qorqytý;

• 287-bap, 3-bólik jáne 288-bap, 1-bólik – qarýdy zańsyz jasaý jáne saqtaý;

• 200-bap, 1-bólik – bóten kólikti urlaý maqsatsyz zańsyz paıdalaný;

• 132-bap, 4-bólik – kámeletke tolmaǵandy qylmys jasaýǵa tartý.

Іs boıynsha barlyǵy úsh kúdikti bar, olardyń ekeýi kámeletke tolmaǵan. Olar «adamdar toby bolyp kisi óltirý» jáne «kámeletke tolmaǵandy qatystyrý arqyly adam urlaý» baptary boıynsha jaýapqa tartylyp jatyr.

— Biz is materıaldarynyń kóshirmesin aldyq jáne sotqa daıyndalyp jatyrmyz. Jábirlenýshi taraptyń ótinishi tergeý barysynda eskerildi, qajetti saraptamalar taǵaıyndaldy jáne olardyń qorytyndysymen tanystyq, - dedi advokat Jandos Palmanov.

Eske salaıyq, Talǵarda 2025 jylǵy 6 qyrkúıekte jantúrshigerlik qylmys boldy: beıtanys adam er kisini atyp, kishkentaı qyzdy alyp qashyp ketken edi.

Tergeý málimetinshe, kúdikti men kishkentaı qyzdyń anasy buryn jaqyn qarym-qatynasta bolǵan. Aralarynda janjal shyǵyp, er adam áıeldiń aǵasyn myltyqpen atyp tastaǵan. Ol alǵan jaraqatynan sol jerde kóz jumǵan.

Keıinirek bul oqıǵa boıynsha polıtsııa qyzmetkerleriniń áreketsizdigine baılanysty is qozǵaldy.