Talǵardaǵy qandy oqıǵa: beıtanys adam er azamatty atyp, balany alyp ketti
QONAEV. KAZINFORM – Áleýmettik jelilerde Talǵar qalasynda beıtanys adam er azamatty atyp óltirip, onyń qyzyn alyp ketkeni týraly aqparat tarady.
Oqıǵa týraly advokat Gaýhar Sárıeva áleýmettik jelidegi paraqshasynda habarlady.
Almaty oblystyq polıtsııa departamentiniń málimetinshe, er adamdy óltirý jáne balany urlaý faktileri boıynsha qylmystyq ister qozǵaldy.
– Tergeý nusqasyna sáıkes, kúdikti men jábirlenýshi buǵan deıin jaqyn qarym-qatynasta bolǵan. Aralarynda janjal shyǵyp, kúdikti jábirlenýshiniń baýyryna ańshy myltyǵymen oq atqan. Ol oqıǵa ornynda qaza tapty. Qylmys jasaǵannan keıin kúdikti kámelet jasqa tolmaǵan balany alyp, izin jasyrǵan. Qazirgi tańda kúdiktiniń jeke basy men júrgen jeri anyqtaldy. Ony ustaý boıynsha sharalar qabyldanyp jatyr, - delingen polıtsııanyń baspasóz qyzmeti taratqan habarlamada.
Sonymen qatar bolǵan oqıǵanyń barlyq mán-jaıyn anyqtaý úshin jedel-tergeý sharalary júrgizilip jatyr.
Keıinirek Іshki ister mınıstrligi polıtsııanyń arnaıy jasaǵy kámelet jasqa tolmaǵan balany qutqarý operatsııasyn sátti júrgizgenin habarlady.
– Bala bosatyldy, onyń ómiri men densaýlyǵyna eshqandaı qaýip joq, - dep habarlady vedomstvo.
Qazirgi ýaqytta kúdiktini dereý ustaý boıynsha sharalar qabyldanyp jatyr.
Іshki ister mınıstri arnaıy operatsııanyń barysyn jeke baqylaýynda ustap otyr.