Talǵardaǵy adam ólimi: jasóspirim qandaı jaraqat aldy
QONAEV. KAZINFORM – Talǵar ortalyq aýdandyq aýrýhanasynyń dárigerleri tóbeles kezinde mert bolǵan jasóspirim Sherzat Bolat pen onyń týysy qandaı jaraqattar alǵany týraly aıtty.
Talǵar aýdandyq aýrýhanasynyń baspasóz qyzmeti málim etkendeı, jasóspirimdi jáne taǵy bir zardap shegýshini emdeý mekemesine Sherzattyń ákesi 4 qazanǵa qaraǵan túni saǵat 00:58-de jetkizgen.
«2008 jyly týǵan patsıentti (Sherzat – red esk.) týystary óte aýyr jaǵdaıda jetkizdi. Onyń sol jaq keýde tusynda, 4-5 qabyrǵa aralyqta pyshaq jaraqattary boldy. Oǵan dereý medıtsınalyq kómek, júrek-ókpe reanımatsııasy kórsetildi, biraq nátıje bolmady. Bıologııalyq ólim tirkeldi»,- dep habarlady aýrýhanadan.
Ekinshi naýqas, 1994 jyly týǵan er adam (Sherzattyń aǵasy – red.esk.) da aýrýhanaǵa saǵat 00:58-de tústi. Biraq ol kelesi kúni tańerteń shyǵyp ketken.
«Naýqastyń alǵan jaraqatyna baılanysty jaǵdaıy ortasha aýyr dárejede dep baǵalandy. Dárigerler oǵan jabyq bas mı jaraqaty, mıdyń shaıqalýy, keýde organdarynyń jabyq jaraqaty dıagnozyn qoıdy. Budan bólek, naýqastyń aıaq- qoly kógergen, bastyń mańdaı aımaǵy syrylǵan, jelke tusynda gematoma paıda bolyp, jumsaq tinderi isip ketken»,- dep atap ótti aýrýhanadan.
Tóbeles saldarynan taǵy bir jigit zardap shekken, ol aýrýhanaǵa jedel járdem kóligimen jetkizilgen. Oǵan medıtsınalyq kómek kórsetilip, qazir ambýlatorlyq em qabyldap jatyr.
Eske salaıyq, 4 qazanda Talǵar qalasyndaǵy tóbelesten bir adam mert bolǵanyn jazǵanbyz.
Ashýly talǵarlyqtar jasóspirim ólimine baılanysty narazylyqqa shyqty.
Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.
Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.
Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi.
Almaty oblystyq polıtsııa departamenti bastyǵynyń mindetin atqarýshy Serik Shalqarov beınebaqylaý kameralarynan alynǵan jazbalar zerttelip jatqanyn jetkizdi.
Keıin áleýmettik jelide janjaldyń beınejazbalary joıyldy degen aqparat tarady.
