Talǵarda jazasyn óteýshilerge arnalǵan elektrondy bilezik shyǵaratyn zaýyt salyndy
ASTANA. QazAqparat - Talǵarda jazasyn óteýshilerge arnalǵan elektrondy bilezik shyǵaratyn zaýyt salyndy. Bul týraly búgin Májilistegi Úkimet saǵatynda QR Іshki ister mınıstri Qalmuhanbet Qasymov málim etti, dep habarlaıdy QazAqparat.
«Bilezikterge qatysty aıtar bolsam, men osy jerde ekinshi ret bul máselege baılanysty sóz sóılep otyrmyn. Shyndyǵynda bul álemdik tájirıbe. Bastapqyda biz tek satyp alǵymyz kelgen bolatyn. Alaıda, bul bıýdjetke úlken aýyrtpalyq túsiredi. Árıne, biz túriktiń, reseılik jáne ızraıldik bilezikterdi satyp ala alar edik, usyndy da. Satyp alǵannan keıin olarǵa kim qyzmet kórsetedi? Ony kim taǵady? Ony qalaı jasaıdy? Mine osyndaı máseleleri boldy», - dep atap ótti mınıstr depýtattardyń saýalyna oraı.
Onyń atap ótinshe, eki jyl boıy atalǵan elektrondy bilezikterdi satyp alýǵa bıýdjetten arnaıy qarjy da bólingen. Biraq, mınıstrlik 2 jyl boıy onyń 1 tıynyn da jumsamaǵan.
«Odan keıin biz basqa baǵdarlamamen júrdik. Qazir Talǵarda zaýyt salyndy. Ol tolyqtaı japondyq qural-jabdyqtarmen jabdyqtalǵan. Ónimderin sizder kórdińizder. Qazir bul baǵdarlama saraptamadan ótip jatyr. Kelesi jyldan memlekettik-jekeshelik seriktestik aıasynda ol óz jumysyn bastaǵannan keıin ónimderin bizge berip, ony paıdalanýdy bastaımyz. Jalǵa alǵanymyz úshin tólem jasap otyramyz. Menińshe, bul bıýdjetti únemdeıdi. Máselen, ızraıldyq ónimdi alsaq, buzylǵan kezde olarǵa únemi júginýimizge týra keledi. Al endi óndirýshi dál qasymyzda, solar qyzmet kórsetetin bolady», - dedi Qalmuhanbet Qasymov.
Foto: MedıaPort
