Talǵarda turǵyndar áıelge zorlyq kórsetýge árekettengen kúdiktini ustaýǵa kómektesti
TALǴAR. QazAqparat - Almaty oblysynda jergilikti turǵyndar jas áıelge zorlyq kórsetýge oqtalǵan kúdiktini ustaýda polıtsııaǵa kómek kórsetti, dep habarlaıdy QazAqparat tilshisi.
Oqıǵa Talǵar qalasynda 3 shildege qaraǵan túni qala kósheleriniń birinde bolǵan. Belgisiz adam 30 jastaǵy áıelge kúsh kórsetip, zorlamaqshy bolǵan. Jaqyn mańnan ótip bara jatqan adamdar áıeldiń aıqaılaǵan daýysyn estip, oqıǵa ornyna polıtsııa shaqyrǵan. Іz sýytpaq bolǵan kúdiktini ustaýǵa kómektesken.
«Qolǵa túsken 44 jastaǵy azamat qala ishi men qala mańyndaǵy eldi mekender arasynda jolaýshy tasymaldaýmen aınalysqan taksı júrgizýshisi bolyp shyqty. Qazir zorlyq kórsetýge oqtalý deregi boıynsha qylmystyq is qozǵaldy. Talǵar aýdanynyń polıtseıleri sotqa deıingi tergeý amaldaryn júrgizýde» - dep málimdedi Almaty oblysy PD baspasóz qyzmetinen.
Vedomstvonyń aqparatyna sáıkes, sol túni Talǵar aýdanynda osyǵan uqsas taǵy bir oqıǵa oryn alyp, belgisiz bireý 19 jastaǵy qyzǵa shabýyl jasaǵan. Qyzdyń qatty aıqaıy men tegeýrindi qarsylyǵy kúdiktiniń aram oıyn iske asyrýǵa kedergi keltirgen. Jedel izdestirý sharalary barysynda tártip saqshylary ony anyqtap, 1991 jylǵy kórshi aýyldyń turǵynyn polıtsııa basqarmasyna jetkizdi.
«Kúdiktiniń jergilikti psıho-narkologııalyq dıspanserde tirkeýde turǵany belgili boldy. Ustalǵan azamat medıtsınalyq mekemege ornalastyryldy. Bul fakti boıynsha da sotqa deıingi tergeý bastaldy»,- dep tolyqtyrdy polıtsııa ókilderi.
Ustalǵan eki azamat ta buǵan deıin qylmystyq jaýapkershilikke tartylmaǵan. Degenmen, Talǵar aýdanynyń polıtsııasy olardyń jaqyn aýdandarda oryn alǵan osyǵan uqsas qylmystarǵa qatysy baryn anyqtaıtyn bolady.
