Talǵarda tótenshe jaǵdaıǵa qarsy zamanaýı dabyl júıesi qosylady
ASTANA. KAZINFORM — Talǵarda selden qorǵaýǵa arnalǵan zamanaýı júıe iske qosylady. Bul týraly ıÝNESKO-nyń Almatydaǵy aımaqtyq keńsesiniń GLOFCA jobasy boıynsha ofıtser Dıana Arıphanova málim etti.
2021 jyldyń sáýirinde klımattyń ózgerýi jaǵdaıynda muzdyqtardaǵy kólderdiń tasqynynan Ortalyq Azııa halqyn qorǵaý jobasy (GLOFCA) ıÝNESKO bastamasymen iske qosyldy.
Dıana Áriphanovanyń aıtýynsha, 105 myńnan astam halqy bar Esik jáne Talǵar qalalary Qazaqstandaǵy pılottyq joba aıasynda qamtyldy. Osy rette Talǵarda 60 myńnan, al Esikte 40 myńnan astam turǵyn bar.
- «Qazseldenqorǵaý» málimetinshe, Talǵar basseınindegi 2023–2024 jyldardaǵy sel tasqyny gıdrotehnıkalyq qurylysty toltyryp, onyń elementterin zaqymdaǵan. Bul jaǵdaı rettelmeıtin tasqyn sý aǵynynyń qaýpin arttyrdy. Sondyqtan qurylysty qalpyna keltirý jumystary qajet boldy. Joba aıasynda qalpyna keltirý, tazartý, zaqymdalǵan ınfraqurylymdy jóndeý jumystary qamtyldy, - dedi joba ofıtseri.
Atap aıtqanda, Talǵarda zamanaýı monıtorıng jáne aldyn ala eskertý júıesin engizý josparlanǵan.
— Ulttyq seriktestermen birlese otyryp, tehnıkalyq sıpattamalar ázirlendi, jabdyqtar satyp alyndy. Osy oraıda kóldi baqylaýdyń úsh stantsııasy, bir gıdrologııalyq stantsııa, datchıkterdiń on túri bekitildi. Sonymen qatar, «Qazseldenqorǵaý» ǵımaratynda derekterdi naqty ýaqyt rejıminde berý jáne óńdeý úshin basqarý ortalyǵy quryldy. Júıeni synaq rejıminde iske qosý tamyz aıynda Tótenshe jaǵdaılar departamentimen jáne «Qazseldenqorǵaý» mekemesimen birlese júzege asady, - dedi ol.
Budan buryn habarlanǵandaı, Qazaqstan men ıÝNESKO tótenshe jaǵdaılarǵa qatysty memorandýmǵa qol qoıady.
