Talǵarda taksı júrgizýshisin balaǵattaǵan er adam izdestirilýde
QONAEV. KAZINFORM – Almaty oblysynyń polıtseıleri taksı júrgizýshisimen dóreki sóılesip, esigin tars jaýyp, kóligin teýip ketken er adamdy izdep jatyr. Oqıǵanyń vıdeosy áleýmettik jelilerde tarady.
Jeli qoldanýshylarynyń aıtýynsha, taksı júrgizýshisine aýyr sózder aıtqan — Talǵar aýdandyq qoǵamdyq keńestiń múshesi.
Almaty oblystyq Polıtsııa departamentiniń málimetinshe, qazirgi ýaqytta taksı júrgizýshisimen janjaldasqan adamdy izdestirý jumystary júrgizilýde.
«Qazirgi ýaqytta Talǵar aýdandyq polıtsııa bóliminiń qyzmetkerleri bul faktini hattamamen tirkedi. Protsessýaldyq sheshim qabyldaý úshin oqıǵaǵa qatysýshylardyń turǵylyqty jerin anyqtaý boıynsha izdestirý sharalary júrgizilýde», - dep habarlady Almaty oblysy ІІD baspasóz qyzmeti.
Almaty oblysynyń ákimdigi onyń Talǵar aýdandyq qoǵamdyq keńesiniń múshesi ekenin rastady.
«Áleýmettik jelilerde Talǵar qalasynda taksı júrgizýshisi men jolaýshy arasyndaǵy janjal túsirilgen vıdeo taralýda. Keıbir aqparat kózderi jolaýshy Gúldala aýylyndaǵy meshittiń ımamy ekenin aıtady. Alaıda Almaty oblysynyń din isteri basqarmasy onyń ımam emes ekenin málimdedi. Atalǵan er adam Talǵar aýdandyq qoǵamdyq keńesiniń múshesi ekenin habarlaımyz. Jalǵan aqparat taratpaýyńyzdy suraımyz», – dep habarlady aýdan ákimdiginen.
