Talǵarda ósimdikter úshin dári-dármek óndiretin zaýyt salynady
TALǴAR. QazAqparat - 2019 jyly Almaty oblysynda «Kazakh Invest» ulttyq kompanııasynyń qoldaýymen ósimdikterdi qorǵaıtyn dárilik zattardy óndiretin zaýyt salynady, dep habarlady QR Indýstrııa jáne damý mınıstrliginiń baspasóz qyzmetinen.
Sheteldik ınvestor - «Agrobest Grýp» túrik holdıngi Qazaqstanda gerbıtsıdter, ınsektıtsıdter, fýngıtsıdter, dánderdi ýlaǵyshtar men glıfosatty shyǵarýǵa 30 mln AQSh dollaryn bóledi.
«Kazakh Invest» osy jobany júzege asyrý úshin qajetti barlyq ruqsattar men memlekettik qoldaý sharalaryn uıymdastyrady. Osyǵan oraı, «Kazakh Invest» óńirlik ókildiginiń qoldaýymen Almaty oblysy Talǵar aýdanynda ornalasqan «Qaırat» ındýstrıaldy aımaǵynda osy jobany iske asyrýǵa jer telimi tańdaldy.
Jobalaý jumystaryna ınvestor taıaý arada kirisýdi josparlap otyr. Zaýyttyń qurylysy aǵymdaǵy jyldyń aıaǵynda bastalyp, 2019 jyly aıaqtalady.
Ónimniń 60% paıyzdan astamy ishki naryqty qamtyp, qalǵan bóligi Túrikmenstan, Ózbekstan, Qyrǵyzstan jáne basqa da elderge eksporttalmaq.
Salynyp jatqan zaýyttyń jalpy qýaty jylyna 12 myń tonnaǵa deıin pestıtsıdterdiń óndirisin quraıtyn bolady. Aımaqta shamamen 200 jumys orny qurylady.
«AgroBest Grýp» túrik kompanııasynyń negizi 2002 jyly qalandy jáne ol pestıtsıdterdiń álemdik naryǵynyń mańyzdy qatysýshysy bolyp tabylady. Óndiristiń jyldyq kólemi - 35000 tonna pestıtsıd, ónim ISO talaptaryna sáıkes shyǵarylady.
